Qashqadaryo viloyati Shahrisabz shahrida jinoyat qidiruv bo‘limi xodimi 6000 dollar pora olib, voqea joyidan qochmoqchi bo‘lganda ushlandi. Bu haqda viloyat Ichki ishlar boshqarmasi axborot xizmati xabar berdi.
Ma’lum bo‘lishicha, viloyat huquqni muhofaza qiluvchi idoralar tomonidan tezkor tadbir o‘tkazilgan. Unda Shahrisabz shahar IIB jinoyat qidiruv bo‘limi xodimi 6000 dollar bilan qo‘lga olingan.
Keltirilishicha, xodim ariza bilan murojaat qilgan fuqaroning shikoyatini qonuniy tartibda o‘rganmagan. Xodim jabrlanuvchining boshqa bir fuqaroga yer maydoni sotib olish uchun bergan 27 000 va u yerda amalga oshirgan qurilish ishlari uchun sarflagan 13 000, jami 40 000 AQSH dollari miqdoridagi pullarini undirib berishda yordamlashishini aytgan
U buning evaziga dastlab 4500 dollar olgan, so‘ngra yana 6000 dollar so‘ragan. Xodimning tezkor tadbir vaqtida voqea joyidan qochishga hamda daliliy ashyoni (pul) yashirishga uringan harakatlari jinoyatni og‘irlashtiruvchi holat sifatida baholanadi. Hozirda xodimga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Bundan avval Ijtimoiy tarmoqlarda bir nechta avtomobil Nexia-3 haydovchisini ta’qib qilgani tasvirlangan video tarqalgandi. “Daryo” muxbirining aniqlashtirishicha, bir nechta avtomobil ta’qibidan qochishga uringan haydovchi pora olishda gumonlangan.
Izoh (0)