Қашқадарё вилояти Шаҳрисабз шаҳрида жиноят қидирув бўлими ходими 6000 доллар пора олиб, воқеа жойидан қочмоқчи бўлганда ушланди. Бу ҳақда вилоят Ички ишлар бошқармаси ахборот хизмати хабар берди.
Маълум бўлишича, вилоят ҳуқуқни муҳофаза қилувчи идоралар томонидан тезкор тадбир ўтказилган. Унда Шаҳрисабз шаҳар ИИБ жиноят қидирув бўлими ходими 6000 доллар билан қўлга олинган.
Келтирилишича, ходим ариза билан мурожаат қилган фуқаронинг шикоятини қонуний тартибда ўрганмаган. Ходим жабрланувчининг бошқа бир фуқарога ер майдони сотиб олиш учун берган 27 000 ва у ерда амалга оширган қурилиш ишлари учун сарфлаган 13 000, жами 40 000 АҚШ доллари миқдоридаги пулларини ундириб беришда ёрдамлашишини айтган
У бунинг эвазига дастлаб 4500 доллар олган, сўнгра яна 6000 доллар сўраган. Ходимнинг тезкор тадбир вақтида воқеа жойидан қочишга ҳамда далилий ашёни (пул) яширишга уринган ҳаракатлари жиноятни оғирлаштирувчи ҳолат сифатида баҳоланади. Ҳозирда ходимга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Бундан аввал Ижтимоий тармоқларда бир нечта автомобиль Nexia-3 ҳайдовчисини таъқиб қилгани тасвирланган видео тарқалганди. «Дарё» мухбирининг аниқлаштиришича, бир нечта автомобиль таъқибидан қочишга уринган ҳайдовчи пора олишда гумонланган.
Изоҳ (0)