Bosh prokuratura Qoraqalpog‘istondagi ommaviy tartibsizliklar yuzasidan qo‘zg‘atilgan jinoyat ishi bo‘yicha ma’lumot berdi

Bosh prokuratura Qoraqalpog‘istonda sodir etilgan ommaviy tartibsizliklar yuzasidan qo‘zg‘atilgan jinoyat ishi bo‘yicha ma’lumot berdi.

Qayd etilishicha, holat yuzasidan 2-iyul kuni Jinoyat kodeksining 159-moddasi  4-qismi (hokimiyatni bosib olish yoki O‘zbekiston Respublikasi konstitutsiyaviy tuzumini ag‘darib tashlash maqsadida fitna uyushtirish) bilan qo‘zg‘atilgan jinoyat ishi bo‘yicha Bosh prokuratura tomonidan dastlabki tergov harakatlari o‘tkazilmoqda. Ushbu moddada ko‘rsatilgan jinoyatni sodir etganlik uchun 10 yildan 20 yilgacha ozodlikdan mahrum qilish jazosi belgilangan.

Shakllantirilgan Bosh prokuratura tergov guruhi zimmasiga yuz bergan hodisalarning barcha holatlarini aniqlash, tergov harakatlarini xolisona hamda qonunchilikka qat’iy rioya etgan holda o‘tkazish vazifasi yuklatilgan.

Tergov harakatlari davomida jinoyat ishi bo‘yicha Jinoyat-protsessual kodeksining 227-moddasi tartibida 14 kishi ushlandi.

Shu jumladan, Tajimuratov D.M. va Turdanov A.T.ga nisbatan Jinoyat kodeksining tegishli moddalari bilan ayblov e’lon qilindi. Ularga nisbatan sudning qarori bilan qamoqqa olish ehtiyot chorasi qo‘llanildi.

Qallixanova L.O.ning harakatlarida jamoat xavfsizligiga tajovuz qilish jinoyati alomatlari aniqlandi. U jinoyat ishi bo‘yicha gumonlanuvchi sifatida jalb qilinib, protsessual tartibda ushlandi.

Xabarda ta’kidlanishicha, tergovga jalb etilgan fuqarolarning sha’ni va qadr-qimmati hurmat qilinishi, qiynoq, zo‘ravonlik, shafqatsiz yoki inson sha’ni va qadr-qimmatini kamsituvchi harakatlarga yo‘l qo‘yilmasligi qat’iy nazoratga olingan.

Gumon qilinuvchi va ayblanuvchilarga himoya huquqi to‘la ta’minlangan holda tergov harakatlari o‘tkazilmoqda, saqlash joylarida qonunda nazarda tutilgan barcha sharoitlar ta’minlangan. Sog‘lig‘i va saqlash sharoitlari bo‘yicha e’tirozlari mavjud emas.

Mavzuga doir:

• Aholini mitingga chaqirgan va qoraqalpoq eliga rahbar bo‘lmoqchi bo‘lgan Dauletmurat Tojimuratov, xizmat xodimlarining buyumlarini olib qo‘ymoqchi bo‘lgan namoyishchilar. Qoraqalpog‘istondagi voqealar qanday boshlangan edi?
• Qoraqalpog‘istonda tartibbuzarlar hujumiga uchragan xorazmlik fermer: “Nevaram qo‘rqqanidan vagonga kirib ketdi, men esa qochib ketdim”
• Yuk mashinasi yoqib yuborilgan haydovchi: “Mashinani chiqarib, yo‘lni yopamiz, bo‘lmasa yondiramiz, deyishdi”
• “Olomonni tarqatish maqsadida qizil rangli bo‘yoq suvga aralashtirib sepilgan” — Milliy gvardiya
• Foto: Yoqib yuborilgan harbiy avtobuslar, odatiy hayot tarziga qaytgan Nukus ko‘chalari, qo‘riqlanayotgan Jo‘qorg‘i Kenges binosi — Qoraqalpog‘iston voqealaridan keyingi hayot