Farg‘ona aeroportidagi chegara-bojxona posti boshlig‘i belgilangan tartibga zid ravishda bojxona nazoratidan o‘tkazish bilan shug‘ullangani uchun qo‘lga olindi. Bu haqda DXX matbuot xizmati xabar berdi.
Ma’lum qilinishicha, Farg‘ona xalqaro aeroporti chegara-bojxona posti boshlig‘i vazifasini bajaruvchi A.S. o‘zining bo‘ysunuvida bo‘lgan xodim X.J. va mahalliy fuqarolar bilan kelishgan holda, moddiy manfaatdorlik evaziga, xorijdan kelayotgan yo‘lovchilar nomiga rasmiylashtirilib, olib kelingan juda ko‘p miqdordagi tovar qimmatliklarni belgilangan tartibga zid ravishda bojxona nazoratidan o‘tkazish bilan shug‘ullangan.
DXXning Farg‘ona viloyati bo‘yicha boshqarmasi xodimlari tomonidan o‘tkazilgan tezkor tadbirda Domodedovo—Farg‘ona yo‘nalishida Moskva shahridan uchib kelgan 4 nafar yo‘lovchi nomiga rasmiylashtirilib, olib kelingan, umumiy qiymati 276,6 million so‘mlik tovar qimmatliklarni qabul qilib olgan vaqtida fuqarolar A.N. va N.A. qo‘lga olingan. Shuningdek, mazkur tovarlar Farg‘ona shahrida yashovchi, tadbirkor R.B.ga tegishli ekani ma’lum bo‘lib, u ham ushlangan.
Tergovga qadar tekshiruv davomida aniqlanishicha, Farg‘ona xalqaro aeroporti chegara-bojxona posti xodimi X.J. o‘zining boshlig‘i A.S.ning ko‘rsatmasiga asosan ushbu tovar qimmatliklarni belgilangan tartibga zid ravishda bojxona nazoratidan o‘tkazib yuborgan.
Hozirda holat yuzasidan DXX Farg‘ona viloyati bo‘yicha boshqarmasi Tergov bo‘limi tomonidan A.S. va boshqalarga nisbatan jinoyat ishi qo‘zg‘atilgan.
Izoh (0)