Qoraqalpog‘istonda tartibbuzarlar hujumiga uchragan xorazmlik fermer: “Nevaram qo‘rqqanidan vagonga kirib ketdi, men esa qochib ketdim”

Iyulning dastlabki kunlarida Qoraqalpog‘iston Respublikasida sodir bo‘lgan voqealarda tinch aholining mol-mulklariga ham hujumlar bo‘lgan. Ulardan biri 23 yildan buyon Qoraqalpog‘istonda yashab kelayotgan xorazmlik fermer Jabborberdi Ismoilov.

Fuqaro “Daryo” muxbiri bilan suhbatda Shumanay tumanida joylashgan fermer xo‘jaligiga hujum bo‘lgani haqida gapirib berdi.

1956-yili Xorazm viloyatida tug‘ilganman. 1999-yili Qoraqalpog‘iston Respublikasiga kelganman, mana bu yil 23 yil bo‘ldi. Dehqonchilik bilan shug‘ullanaman, o‘zim bilan birga oila a’zolarim, qarindoshlarimni olib kelib ish bilan ta’minlaganman. Har yili ko‘pgina insonlarni ish bilan ta’minlaymiz. Bug‘doy, sholi, paxta yetishtirish bilan shug‘ullanamiz.

2-iyuldan 3-iyulga o‘tar kechasi soat 00:30 larda uxlayotgandik, tashqarida to‘s-to‘polon bo‘lib ketdi. Baqir-chaqir ovozidan uyg‘onib, tashqariga chiqsam hamma joy kunduzdek yorug‘ bo‘lib turibdi. Kombaynimizning orqa balonida bir tonna karbamid bor, yangi olingan dehqonlar mashinasi bor edi, uning orqa qismi, ikkita traktorimiz bor edi, ularning ham orqa qismi yonayotgan ekan.

Nevaram 23 yoshli Jaloliddin 12 metrlik vagon-uyimizda uxlab yotgandi, uni uyg‘otdim. Keyin qarasam texniklarimizni sindirayotgan odamlarning hammasi qochib ketibdi. Ular kiyimlarini boshlariga niqob tariqasida kiyib olib, texnikalarimizga zarar yetkazayotgan ekan. Yonib turgan barcha narsani o‘chirdik va ichki ishlar organlariga qo‘ng‘iroq qildim. Olov pasaygach ular yana qaytib kelishdi. Ular 6-7 kishi edi. Yaqin kelib, qo‘llaridagi turli vositalar bilan bizni urmoqchi bo‘lishdi. Nevaram qo‘rqqanidan vagonga kirib ketdi, men esa qochib ketdim. Qochib ketayotganimda ular izimdan quvib borishdi, o‘zimni qamishzorga otdim. Shu yerda yashirinib yotdim. Meni topa olmagach ortga qaytib ketishdi. Qaytib borsam kombaynlarim, bir vagon ichidagi 150 million so‘mlik ehtiyot qismlar yonib ketibdi. Hozir hujum qilganlarni tutib kelishdi, tergov davom etyapti.

Jabborberdi Ismoilov

Nukus voqealari xronologiyasi

1-iyul kuni soat taxminan 15:00 lardan boshlab Nukusda ayrim fuqarolar amalga oshirilayotgan konstitutsiyaviy islohotlarni noto‘g‘ri talqin qilib, kutilmaganda ko‘cha yurishlarini tashkil qildi. Nukusning Markaziy dehqon bozorida to‘planib, namoyishlar uyushtirildi. Jamoat tartibining buzilishining oldini olish hamda fuqarolar tomonidan turli tartibbuzarliklarni sodir etishlariga yo‘l qo‘ymaslik maqsadida dehqon bozori hududiga huquqni muhofaza qilish organlarining kuch va vositalari jalb etildi.

Shavkat Mirziyoyev 2-iyul kuni Nukusga bordi va Jo‘qorg‘i Kenges deputatlari, Qoraqalpog‘iston faxriylari va faollari bilan uchrashuv o‘tkazdi. Uchrashuvda prezident Konstitutsiyaning Qoraqalpog‘istonga tegishli moddalarini amaldagi tahrirda o‘zgarishsiz qoldirish zarurligini aytdi. Qoraqalpog‘iston xalqiga murojaat qilib, Konstitutsiyaviy qonun loyihasi referendumdan keyingina qonuniy tusga kirishini aytib, fuqarolarning xohish-irodasi, taklif va fikrlaridan kelib chiqqan holda, ushbu loyiha o‘zgarib, takomiliga yetkazilishini ta’kidladi.

“Nega menga telefon qilib aytmading odamlar norozi bo‘layotganini? Menga ham Qoraqalpog‘istonning ertasi, tinchligi kerak”, — degan Shavkat Mirziyoyev.

Davlat rahbari hozirgi vaziyatda barcha fuqarolarni hamjihatlik va birdamlikka, oqilona ish ko‘rishga, turli g‘arazli chaqiriq va harakatlarga berilmaslikka da’vat etdi.

Shundan so‘ng  prezident farmoni bilan Qoraqalpog‘istonda 3-iyuldan 2-avgustgacha favqulodda holat joriy etilib, bir qator chora va vaqtinchalik cheklovlar o‘rnatildi. Favqulodda holat amal qilishi davrida O‘zbekiston Mudofaa vazirligi kuchlari va vositalari qo‘shimcha ravishda jalb etilishi belgilandi.

3-iyul kuni Shavkat Mirziyoyev yana Nukusga borib, videoselektor o‘tkazdi. Tuman hokimlari va huquqni muhofaza qiluvchi organlar rahbarlari fuqarolarning xavfsizligini ta’minlash, qonuniylik va huquq-tartibotni mustahkamlash bo‘yicha ko‘rilayotgan chora-tadbirlar yuzasidan axborot bergan. Davlat rahbarining murojaatidan keyin vaziyat barqarorlashgani, hayot o‘z maromiga qaytayotgani ma’lum qilindi.

4-iyul kuni O‘zbekiston Bosh prokuraturasi “Meni Qoraqalpoqqa bosh qilib, izimdan yurishingizni so‘rayman”, deya xalqni mitingga chorlagan bloger Konstitutsiyaviy tuzumga tajovuzda ayblanayotganini ma’lum qildi.

Qoraqalpog‘iston Respublikasi hududi komendanti, general mayor Rustam Jo‘rayev Qoraqalpog‘istondagi tartibsizliklarda 14 nafar fuqaro tartibsizliklar sodir bo‘lgan joyda turli darajadagi jarohatlardan vafot etgani, ulardan 13 nafari alkogol va giyohvand moddalar ta’sirida bo‘lganini ma’lum qildi. Shuningdek, xizmat burchini bajargan huquq-tartibot organlari xodimlaridan ham 4 nafari halok bo‘lgan.