8-iyul kuni Oliy Majlis Senatining yigirma sakkizinchi yalpi majlisi o‘z ishini boshladi. Senat matbuot xizmatining ma’lum qilishicha, majlis avvalida Tanzila Norboyeva Qoraqalpog‘istondagi holatlarga munosabat bildirdi.
“Qoraqalpog‘istonda ayrim noxush hodisalar sodir bo‘lganidan ham barchangizning xabaringiz bor. Ayrim kuchlarning qanchalik harakat qilishiga qaramasdan bo‘lib o‘tgan bu hodisalar hech qachon xalqimizning birdamligiga rahna sola olmasligiga guvohi bo‘ldik.
Shu bilan birga sodir bo‘lgan bu holatda hammamiz o‘zimizga to‘g‘ri xulosa chiqarishimiz va o‘z ishimizni qayta ko‘rib chiqishimiz lozim bo‘ladi. Kuni kecha prezidentimiz huzurida bo‘lib o‘tgan yig‘ilishda davlatimiz rahbari ham bu masalaga alohida e’tibor qaratdi.
Avvalo, bu voqealar barcha masalalar xalq bilan hamnafas tarzda va o‘z vaqtida yechilishiga barcha davlat organlari va idoralarining kuchi va resurslarini jalb qilish zarurligini ko‘rsatmoqda”, — degan Senat raisi.
Uning ta’kidlashicha, aholi tomonidan ko‘tarilayotgan muammo va masalaning katta va kichigi bo‘lmaydi. Ularning har birini yechimi muhimdir.
“Har qanday kichik deb qaralgan masala o‘z yechimini topmagan taqdirda, albatta, bir kuni katta muammoga aylanadi. Xalq vakillari sifatida bunday holatga yo‘l qo‘yilmasligi uchun birinchi navbatda biz mas’ulmiz! Muxtasar qilib aytganda, o‘z ishimizni tanqidiy qayta ko‘rib chiqishimiz lozim bo‘ladi.
Fursatdan foydalanib, Qoraqalpog‘istondagi voqealarda qurbon bo‘lgan hamyurtlarimizning oila a’zolari va yaqinlariga o‘zim hamda senatorlarimiz nomidan hamdardlik bildiraman va sabr tilayman, shifoxonalarda davolanayotgan fuqarorlarimizga esa tezroq sog‘ayib ketishlarini tilaymiz. Yurtimiz doim tinch va osoyishta, xalqimiz farovon bo‘lsin!”, — degan Tanzila Norboyeva.
Mavzuga doir:
- Foto: Yoqib yuborilgan harbiy avtobuslar, odatiy hayot tarziga qaytgan Nukus ko‘chalari, qo‘riqlanayotgan Jo‘qorg‘i Kenges binosi — Qoraqalpog‘iston voqealaridan keyingi hayot
- Qoraqalpog‘istonda tartibbuzarlar hujumiga uchragan xorazmlik fermer: “Nevaram qo‘rqqanidan vagonga kirib ketdi, men esa qochib ketdim”
- Yuk mashinasi yoqib yuborilgan haydovchi: “Mashinani chiqarib, yo‘lni yopamiz, bo‘lmasa yondiramiz, deyishdi”
- “Olomonni tarqatish maqsadida qizil rangli bo‘yoq suvga aralashtirib sepilgan” — Milliy gvardiya
- Aholini mitingga chaqirgan va qoraqalpoq eliga rahbar bo‘lmoqchi bo‘lgan Dauletmurat Tojimuratov, xizmat xodimlarining buyumlarini olib qo‘ymoqchi bo‘lgan namoyishchilar. Qoraqalpog‘istondagi voqealar qanday boshlangan edi?
Izoh (0)