Kobuldan 60 km shimolda joylashgan Bag‘rom aerodromi “Tolibon” harakatiga qarshi kurashayotgan Afg‘oniston ozodlik fronti jangchilari tomonidan hujumga uchradi. Bu haqda Aamaj News agentligi xabar berdi.
“Bugun (5-iyul) front Parvon viloyatidagi Bag‘rom aerodromiga raketa zarbalari berilgani, natijada olti nafar toliblar o‘ldirilib, ikki kishi yarador qilingani haqida xabar e‘lon qildi va videotasvir joyladi”, — deyiladi xabarda.
May oxirida Afg‘oniston qarshilik kuchlari Panjsherda janglar qayta boshlanganini ma’lum qilgan edi. Panjsher darasida to‘qnashuvlar bo‘lib o‘tgan, buning oqibatida bir kechada 27 nafar toliblar o‘ldirilgan.
Iyun oxirlarida “Tolibon” harakatining Afg‘onistonning shimoliy Badaxshon viloyatidagi bo‘linmalari qo‘mondoni, dala qo‘mondoni Qori Vakkas o‘z jangarilari bilan birga Milliy qarshilik fronti tomoniga o‘tib ketgani xabar berildi.
“Tolibon” 2021-yil avgustida Afg‘onistonda hokimiyat tepasiga kelgan edi. AQSH va uning ittifoqchilari o‘z qo‘shinlarini olib ketishni boshlaganidan keyin toliblar hujumga o‘tgan edi. Ular navbat bilan yirik shaharlarni egallab, avgust o‘rtasida Kobulga kirdi va davlat to‘liq egallab olinganini e’lon qildi. Prezident Ashraf G‘ani BAAga qochib ketdi.
Qarshilik kuchlari Panjsher viloyatiga to‘plandi. Unga afg‘on urushi davrlaridagi qo‘mondon Ahmadshoh Mas’udning o‘g‘li Ahmad Mas’ud va G‘ani qochib ketganidan keyin o‘zini davlat rahbari deb e’lon qilgan Afg‘oniston vitse-prezidenti Amrulla Solih rahbarlik qildi.
Izoh (0)