Zaporojye viloyatining harbiy xizmat yoshidagi aholisi armiyaga chaqirilmaslik uchun Rossiya nazorati ostidagi hududlarga ketishi mumkin. Bu haqda Zaporojye viloyati harbiy-fuqarolik ma’muriyati bosh kengashi a’zosi Vladimir Rogov ma’lum qildi.
“Chiqiruv qog‘ozlarini qabul qilmang, ro‘yxatdan o‘tish manzilida qolmang, u yerda sizni osongina topish mumkin. Iloji bo‘lsa, shahardan chiqib ozod qilingan hududlarga jo‘nab keting”, — deya chaqirdi Rogov Telegram-kanalida.
U, shuningdek, Kiyev Ukraina aholisini qul qilish siyosatini olib borayotganini, buni aynan Zaporojye viloyatida amalga oshira boshlaganini da’vo qildi.
5-iyul kuni Ukraina Qurolli kuchlari Bosh shtabi harbiy xizmatni o‘tashga majbur bo‘lganlarning yashash joyidan tashqariga chiqishi faqat harbiy komissar ruxsati bilan amalga oshirilishi mumkinligini ma’lum qildi. Bosh shtab ma’lumotlariga ko‘ra, Ukrainaning 1992-yildan beri amalda bo‘lgan “Harbiy burch va harbiy xizmat to‘g‘risida”gi qonuni normasiga ko‘ra, urush davrida muddatli harbiy xizmatga chaqiriluvchilar va zahiradagi harbiy xizmatchilarning tegishli hududiy chaqiruv va aholini ijtimoiy qo‘llab-quvvatlash markazi boshlig‘ining ruxsatisiz yashash joyini tark etishi taqiqlanadi.
Ukraina prezidenti Vladimir Zelenskiy Bosh shtabning harbiy xizmat yoshidagi shaxslarning yashash joyini harbiy komissiyalarning ruxsatisiz tark etishini taqiqlash to‘g‘risidagi qarori bilan bog‘liq vaziyatga aralashdi. Davlat rahbari ochiqchasiga Bosh shtabdan usiz bunday qarorlar qabul qilmaslikni so‘radi.
Izoh (0)