O‘zbekiston eng ko‘p oltin sotib olgan mamlakatlar ro‘yxatiga kirdi

Butun dunyo bo‘ylab markaziy banklar may oyida oltin xarid qilishni kuchaytirgan. Ular qatorida O‘zbekiston Markaziy banki ham mavjud. Bu haqda Butunjahon Oltin kengashi (WGC) xabar berdi.

Markaziy banklar may oyida global oltin zaxiralarini 35 tonnaga ko‘paytirdi. Aprel oyida esa ular 19,4 tonna sotib olgan edi.

Oltinning eng yirik xaridorlari Turkiya (13 tonna), O‘zbekiston (9 tonna), Qozog‘iston (6 tonna), Qatar (5 tonna) va Hindiston (4 tonna) bo‘lgan.

Yagona muhim oltin sotuvchi davlat Germaniya bo‘lib, may oyida u oltin zaxiralarini ikki tonnaga kamaytirgan.

Iyun oyida ham markaziy banklar oltin sotib olish ko‘rsatkichlarini oshirgan ko‘rinadi — Iroq Markaziy banki iyun oyida 34 tonna oltin sotib olganini e’lon qilgan.

Yil boshidan buyon Turkiya (56 tonna), Misr (44 tonna) va Iroq (34 tonna) oltin xarid qilishda yetakchilik qilmoqda.

Markaziy banklarning o‘z zaxiralariga oltin qo‘shishining eng keng tarqalgan usuli — uni birjadan tashqari bozorlardan sotib olish. 

Avvalroq O‘zbekiston ikki oydan beri oltin sotmayotgani haqida xabar berilgandi.