Бутун дунё бўйлаб марказий банклар май ойида олтин харид қилишни кучайтирган. Улар қаторида Ўзбекистон Марказий банки ҳам мавжуд. Бу ҳақда Бутунжаҳон Олтин кенгаши (WGC) хабар берди.
Марказий банклар май ойида глобал олтин захираларини 35 тоннага кўпайтирди. Апрель ойида эса улар 19,4 тонна сотиб олган эди.
Олтиннинг энг йирик харидорлари Туркия (13 тонна), Ўзбекистон (9 тонна), Қозоғистон (6 тонна), Қатар (5 тонна) ва Ҳиндистон (4 тонна) бўлган.
Ягона муҳим олтин сотувчи давлат Германия бўлиб, май ойида у олтин захираларини икки тоннага камайтирган.
Июнь ойида ҳам марказий банклар олтин сотиб олиш кўрсаткичларини оширган кўринади — Ироқ Марказий банки июнь ойида 34 тонна олтин сотиб олганини эълон қилган.
Йил бошидан буён Туркия (56 тонна), Миср (44 тонна) ва Ироқ (34 тонна) олтин харид қилишда етакчилик қилмоқда.
Марказий банкларнинг ўз захираларига олтин қўшишининг энг кенг тарқалган усули — уни биржадан ташқари бозорлардан сотиб олиш.
Аввалроқ Ўзбекистон икки ойдан бери олтин сотмаётгани ҳақида хабар берилганди.
Изоҳ (0)