Navoiy viloyati Karmana tumanida sodir bo‘lgan yo‘l-transport hodisasi inson o‘limi bilan yakunlandi. Bu haqda viloyat Ichki ishlar boshqarmasi xabar qildi.
Qayd etilishicha, holat taxminan soat 23:30 da Karmana tumani hududidan o‘tuvchi M-37 avtomobil yo‘lining 155-kilometrida sodir bo‘lgan. Farg‘onalik haydovchi (21 yoshli) o‘z boshqaruvida bo‘lgan “KamAZ” yuk mashinasida yo‘l qoidalariga amal qilmasdan, bir yo‘nalishdagi velosipedchini avtomashinaning o‘ng yon tomoni bilan urib yuborgan.
YTH oqibatida velosiped boshqaruvchisi bo‘lgan jabrlanuvchi (38 yoshli) og‘ir tan jarohati bilan shifoxonaning jonlantirish bo‘limiga yotqizilgan. Ko‘rsatilgan tibbiy muolajalarga qaramay, fuqaro vafot etgan.
Holat yuzasidan “KamAZ” haydovchisiga nisbatan Jinoyat kodeksining tegishli bandlari bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)