Marhum o‘zbek san’atkorlarining farzandlari qaysi sohalarda faoliyat yuritadi? (foto)

Inson necha yosh bo‘lmasin, ota-onadan ayrilish og‘ir musibat. Biroq hayot davom etadi. Taqdir taqozosi bilan ota-onasidan erta ayrilgan mashhurlarning farzandlari bugungi kunda nimalar bilan band? Quyida shu haqda so‘z boradi.

Alisher Hamroyev

“Yodgor” filmi orqali minglab tomoshabinlar mehrini qozongan aktyor Alisher Hamroyevning ikki nafar farzandi bor. Ayni kunlarda Madina ingliz filologiyasi bo‘yicha tahsil olyapti. U universitetda 3-kurs bo‘lish bilan birga o‘quv markazida ham ishlaydi. Aktyorning o‘g‘li Iskandar esa universitetga kirishga tayyorgarlik ko‘rmoqda. Otasi va onasidan erta ayrilgan Madina va Iskandar xolasining qaramog‘ida tarbiyalanmoqda.

Zokir O‘rmonov

“Charxpalak” serialidagi roli bilan yaxshi tanish bo‘lgan aktyor Zokir O‘rmonov saraton xastaligi sabab vafot etgan. Undan Muhammadjon va Samir ismli o‘g‘illar qoldi. Samir 22 yoshda — u Moskva davlat texnologiyalar va boshqaruv universitetida tahsil olyapti. 19 yoshni qarshilagan Muhammadjon esa universitetga kirishga tayyorgarlik ko‘rmoqda.

Shahnozabonu

42 yoshida olamdan o‘tgan xonanda Shahnozabonuning yolg‘izgina qizi bor. Umidaxon Yo‘ldosheva onasining tavsiyasiga ko‘ra sartaroshlik kasbini egallagan. Umidaxon oilali, uning 4 yoshli Amirbek ismli o‘g‘li bor.

Fathulla Mas’udov

O‘zbekistonda xizmat ko‘rsatgan artist, marhum ijodkor Fathulla Mas’udovdan ham uch farzand qolgan. To‘ng‘ich farzandi Gulnoza farzandlar tarbiyasi bilan band. O‘g‘li Ulug‘bek (Habibulloh) esa bir necha yildan buyon kichik tadbirkorlik bilan shug‘ullanadi. Kenjatoyi Abdulloh esa O‘zbekiston davlat drama teatrida aktyor sifatida faoliyat yuritadi. Ayrim sabablarga ko‘ra, u otasi rahbarlik qilgan O‘zbek Milliy akademik drama teatrida faoliyat yuritolmadi.

Mo‘min Oripov 

“Bojalar” guruhining a’zosi Mo‘min Oripov 25 yoshida hayotdan ko‘z yumgan. Uning o‘limiga Surxondaryodagi avtohalokat sabab bo‘lgan. Ijodkor vafot etganida o‘g‘li Bilolxo‘ja bir yashar bolakay edi. U ayni damda maktabni tamomlash arafasida. Onasi Kamola Oripova turmushga chiqqan. Uning ikkinchi turmushidan Maryamxon va Nuraniya ismli qizlari bor.

Shuhrat Nuraliyev

Komik aktyor Shuhrat Nuraliyev xastalik sabab 37 yoshida vafot etgan. Uning Maftuna, Umarjon va Sarviniso ismli farzandlari bor. 19 yoshni qarshilagan Maftuna yetkazib berish xizmati sohasida faoliyat yuritadi.

O‘g‘li Umarjon esa 17 yoshda, sportga qiziqadi. Ayni kunlarda u sport sohasi bo‘yicha institutda o‘qishga tayyorgarlik ko‘rmoqda. Qizi Sarviniso esa 16 yoshda va maktabda tahsil olmoqda.

Mirza Azizov

O‘zbekiston xalq artisti Mirza Azizov 2021-yili koronavirus sabab vafot etgan. Uning bir o‘g‘il va bir qiz farzandi bor. O‘g‘li Azizxon tadbirkor. Qizi Mahzunaxon esa uy bekasi.

Rahmatilla Mirzayev

Marhum suxandon Rahmatilla Mirzayev va xonanda A’lo Rahimovaning nikohidan yolg‘iz qiz farzandi bor. Shodiyabegim Mirzayeva 19 yoshda va u Turkiyadagi Nishantashi universitetining Sahna san’ati fakultetida tahsil oladi.

Abdurayim Abduvahobov

O‘zbekistonda xizmat ko‘rsatgan artist Abdurayim Abduvahobov rafiqasi Gulnora opa bilan uch farzandni voyaga yetkazdi. Katta o‘g‘li Abduqahhor “O‘zbekfilm”da faoliyat yuritadi. Kichik o‘g‘li Abdujabbor esa “Obodonlashtirish bosh boshqarmasi”da muhandis bo‘lib ishlaydi. Qizi Dildoraxon esa farzandlar tarbiyasi bilan band.

Aziza Niyozmetova

Saraton xastaligi sabab 46 yoshida vafot etgan xonanda Aziza Niyozmetova o‘z intervyularida 6 farzandning onasi ekanligini va ularning to‘rttasini o‘zi dunyoga keltirganini aytardi. Xonandaning to‘ng‘ich farzandlari Nilufar va Miraziz Nazariylar ancha ulg‘ayib qolgan va hali voyaga yetmagan singillariga g‘amxo‘rlik qiladi. Ular onasining o‘limidan keyin tadbirkorlik ishlarini davom ettirishga astoydil bel bog‘ladi.

Nilufar Nazariyning yolg‘iz o‘g‘li bor. Miraziz Nazariy esa 2021-yil oila qurdi. Xonandaning uchinchi farzandi Diyora maktabni tamomladi. Ikki yoshida onasidan yetim qolgan Madina esa olti yoshga to‘ldi va maktabga chiqishga tayyorgarlik ko‘rmoqda.