Niderlandiyada hukumatga qarshi norozilik bildirgan fermerlar ulgurji oziq-ovqat omborlarini to‘sib qo‘yishdi

Niderlandiyalik fermerlar mamlakatning ifloslantiruvchi moddalar chiqindilarini kamaytirish rejasiga qarshi norozilik sifatida supermarketlarning ulgurji bazalarini to‘sib qo‘ydi, deya xabar berdi 4-iyul kuni Associated Press nashri.

“Ulgurji savdo do‘konlarining blokadasi Niderlandiya fuqarolariga zarar yetkazdi. Supermarketlar bazalardan oziq-ovqat mahsulotlarini olish uchun qo‘lidan kelgan barcha ishni qilmoqda, ammo agar blokada davom etsa, bu odamlarning kundalik xaridlarini amalga oshira olmasligiga olib kelishi mumkin”, - deydi mamlakatning Markaziy oziq-ovqat savdo byurosi.

Xususan, dushanba kuni Amsterdam shimolida joylashgan Zaandam saharidagi Albert Heijn supermarketlar tarmog‘ining ulgurji bazasini 25 ga yaqin traktor blokada qilgan. Transportlarga plakat va bannerlar bilan osilgan.

Niderlandiyaning asosiy aeroporti bo‘lgan Schipholda sayohatchilardan terminallarga borish uchun jamoat transportidan foydalanishni so‘ralyapti, chunki ular blokada aeroportlarga ham ta’sir qilishi mumkinligidan xavotirlanmoqda. Avvalroq baliqchilar fermerlar bilan birdamlik uchun mamlakatdagi bir qancha portlarni to‘sib qo‘ygan edi.

Fermerlar 2030-yilga borib azot oksidi va ammiak kabi ifloslantiruvchi moddalar emissiyasini 50 foizga kamaytirishni talab qiladigan rejadan norozi. Bu qaror chorva mollari sonining qisqarishiga va chorva mollari ko‘p miqdorda ammiak ishlab chiqaradigan ayrim xo‘jaliklarning yopilishiga olib kelishi kutilmoqda.