“Nega bizga salom bermaysan?” — Karmanada izzattalab bezorilar jazolandi

Navoiy viloyati Karmana tumani “Kalovat” mahallasida istiqomat qiluvchi 30 yoshli Sanjar qo‘shni mahalladagi do‘sti bilan mashinada ko‘cha sang‘ishni odat qildi. Bu safar ham ular tegganga tegib, tegmaganga kesak otib vaqtini o‘tkazar, boshqalarni mazax qilib rohatlanardi. Bundaylarga salom berish tugul yuziga qaraging kelmaydi.

Bir kuni tasodifan o‘zining yumushlari bilan yurgan Behzodni to‘xtatib, “Nega bizga salom bermaysan”, deya so‘roqqa tutadi. Izzattalab Sanjarning bema’ni so‘roqlari janjalga aylanib, ikkovlon Behzodni do‘pposladi. Olingan tan jarohati tibbiy ma’lumotnomada bosh miya chayqalishi, bosh miya yopiq jarohati, o‘ng yonoq va gaymar suyagi sinishi, o‘ng ko‘z qovoqlari lat yeyishi va qontalashi tashxisi bilan qayd etildi.

Sanjar hamda uning o‘rtog‘i o‘zlarining xatti-harakatlari uchun endi qonun oldida javob beradi.

Ularga nisbatan Jinoyat kodeksining 277-moddasi 2-qismi “a, b” bandlari bilan jinoyat ishi qo‘zg‘atilib tergov harakatlari olib borilmoqda.