O‘zbekistonda 2022-yilning o‘tgan besh oyi mobaynida ishlab chiqarishdagi 332 ta baxtsiz hodisa oqibatida 96 nafar xodim vafot etgan. Bu haqda Bandlik va mehnat munosabatlari vazirligida bo‘lib o‘tgan Jamoatchilik kengashi yig‘ilishida ma’lum qilingan.
O‘zbekiston Kasaba uyushmalari Federatsiyasi bo‘limi boshlig‘i Nodira G‘oyibnazarovaning ma’lumot berishicha, ishlab chiqarishda ro‘y bergan 332 ta baxtsiz hodisa tekshirilgan bo‘lib, unda 366 nafar xodim shikastlangani, 6 nafar xodim yengil va 264 nafar ishchi xodim og‘ir tan jarohati olgani ma’lum bo‘lgan.
“Ming afsuslar bo‘lsinki, tashkilotlar ko‘pincha baxtsiz hodisa ro‘y berganini yashirib, baxtsiz hodisadan jabrlangan yoki vafot etgan xodimiga kompensatsiya to‘lashdan qochadi. To‘g‘ri, ularning ishi tashkilot daromadini oshirish, kamaytirish emas. Lekin bunga kafolatlangan mehnat sharoitini yaratib berib, xodimining samarali mehnati ortidan erishish kerak”, — deydi Nodira G‘oyibnazarova.
Ma’lumot berilishicha, Davlat mehnat inspeksiyasiga 2022-yilning o‘tgan besh oyi mobaynida mehnat munosabatlariga oid 9400 dan ortiq murojaat kelib tushgan.
“Dunyo bo‘yicha tahlil qilinganida har kuni 5-6 million kishi uyidan ishga deb chiqib ketyapti, ammo qaytib kelmayapti. Nimaga? Sababi kafolatlangan ish sharoitida mehnat qilmagani bois, ishlab chiqarish jarayonida sodir bo‘layotgan baxtsiz hodisalar qurboniga aylanmoqda. Bu judayam dahshat. Bu holat O‘zbekistonda ham bor, yo‘q emas. Shuning uchun biz har doim maxsus kiyim bosh bilan mehnat qiluvchi barcha tashkilot va korxonalar mas’ullariga sertifikatlangan maxsus kiyim-bosh olib, ishchilari uchun xavfsiz va kafolatlangan mehnat sharoitini yaratib berishlarini so‘rab kelamiz”, — deydi Nodira G‘oyibnazarova.
Qayd etilishicha, 2021-yilda ishlab chiqarishda sodir bo‘lgan 810 ta baxtsiz hodisa o‘rganilganda hodisa oqibatida 907 nafar xodim tan jarohati olgani, 238 nafar xodim vafot etgani, 37 nafar xodim yengil, 632 nafar xodim esa og‘ir tan jarohati olgani ma’lum bo‘lgan.
Izoh (0)