Bandlik va mehnat munosabatlari vaziri Nozim Husanov vazirlikka kelib tushayotgan murojaatlarning aksariyatida mehnat munosabatlarida qonun buzilishi va ish haqini ololmaslik masalasida ko‘mak so‘ralayotganini aytdi. Bu haqda vazir vazirlik huzuridagi jamoatchilik kengashi yig‘ilishida ma’lum qildi.
Nozim Husanovning ma’lumot berishicha, 2022-yilning yanvar—iyun oylari davomida vazirlikka ijtimoiy tarmoqlar orqali 75 ta murojaat kelib tushgan bo‘lib, mazkur murojaatlarning aksariyatida mehnat huquqlarining buzilishi va ish haqini olishda muammolarga duch kelinayotgani bildirilgan.
“Ijtimoiy tarmoqlar orqali kelib tushgan murojaatlarning 17 tasida murojaatchi o‘z vaqtida ish haqini ololmayotganini aytgan bo‘lsa, 14 tasida mehnat huquqlarining buzilishiga yo‘l qo‘yilgani oshkor qilingan. Shuningdek, 13 ta murojaatda ishdan tashqari vaqtda ishga jalb qilish, 12 ta murojaatda mehnat munosabatlari buzilishi, 11 ta murojaatda migratsiya masalasi va 8 ta holatda ish vaqtidan tashqari yig‘ilishlar o‘tkazilayotgani ma’lum qilingan”, — deydi Bandlik va mehnat munosabatlari vaziri Nozim Husanov.
Vazirning qo‘shimcha qilishicha, ijtimoiy tarmoqlar orqali kelib tushgan mazkur murojaatlar o‘z vaqtida o‘rganilib, qisqa fursatda yechimini topgan.
Tadbirda qo‘shimcha ma’lumot berilishicha, yil boshidan ayni kunga qadar vazirlikka kelib tushgan jami murojaatlar soni esa 197 ming 66 tani tashkil qiladi.
“Mazkur muammolarning 74 ming 201 tasi qanoatlantirilgan. 110 ming 265 tasiga tushuntirish berilgan, 748 tasi ko‘rmay qoldirilgan. 10 ming 340 tasi o‘rganish jarayonida bo‘lsa, 617 tasi rad etilgan. 895 tasi esa boshqa tashkilotlarga yo‘naltirilgan. Eng achinarlisi vazirlikka kelib tushgan jami 197 mingta murojaatning ham 7 ming 542 tasi ham aynan oylik-maoshini o‘z vatqida olmaslik bilan bog‘liq murojaat”, — deydi vazir.
Izoh (0)