Oliy va o‘rta maxsus ta’lim vazirligida 4-iyun kuni Yaponiyaning O‘zbekistondagi elchisi Yoshinori Fujiyama, Yaponiya xalqaro hamkorlik agentligi (JICA)ning O‘zbekistondagi vakolatxonasi rahbari Suguru Miyazaki boshchiligidagi delegatsiyasi bilan uchrashuv bo‘lib o‘tdi. Bu haqda vazirlik axborot xizmati xabar qildi.
Qayd etilishicha, muloqotda dastlab, mamlakat ta’lim tizimida amalga oshirilayotgan islohotlar, kunchiqar davlat bilan hamkorlik aloqalarining bugungi holati va istiqbollari muhokama qilingan.
Yaponiya hukumati tomonidan 20 yildan ortiq vaqt mobaynida moliyalashtirilayotgan mazkur loyiha doirasida Yaponiyaning taniqli universitetlarida 378 nafar fuqaro tahsil olish imkoniga ega bo‘lgan. Ularning 343 nafari O‘zbekistonga magistrlik darajasi bilan qaytib, bugun xalq xo‘jaligining turli tarmoqlarida faoliyat olib bormoqda. Bugungi kunda yana 35 kishi Yaponiyada o‘qishini davom ettiryapti.
Muhokamalarda, shuningdek, kadrlar tayyorlash sohasida hamkorlik to‘g‘risida, xususan, qo‘shma loyiha doirasida O‘zbekiston fuqarolarining Yaponiya universitetlarida magistratura va doktoranturada tahsil olishi haqida so‘z borgan.
Tomonlar o‘rtasida hamkorlik kelishuvlari imzolangan. Dastlab O‘zbekiston hukumati nomidan oliy va o‘rta maxsus ta’lim vaziri Abduqodir Toshqulov va Yaponiya elchisi Yoshinori Fujiyama o‘rtasida 2,76 million dollar qiymatidagi kadrlar tayyorlash uchun stipendiyalar loyihalari doirasida Almashinuv notasi hamda ushbu loyihani bajarish bo‘yicha Yaponiya xalqaro hamkorlik agentligi (JICA) bilan grant gitimi imzolangan.
Ushbu loyihalar doirasida kelasi yilda 18 ta davlat xizmatchisiga Yaponiyada magistratura va doktoranturada o‘qish imkoni yaratiladi.
Izoh (0)