“O‘tgan yili 20 nafar mansabdor majburiy mehnatga yo‘l qo‘ygani uchun ulardan 1,9 mlrd jarima undirilgan” — mehnat vaziri

Bandlik va mehnat munosabatlari vaziri Nozim Husanov O‘zbekistonda 2021-yil 20 nafar mansabdor majburiy mehnatga yo‘l qo‘ygani uchun ulardan 1,9 milliard so‘m jarima undirilganini ma’lum qildi. Vazir bu haqda “Daryo” bilan suhbatda aytib o‘tgan.

“2021-yilda 20 ta holatda shuncha mansabdor tomonidan majburiy  mehnatga yo‘l qo‘yish holati aniqlanib, ulardan 1,9 milliard so‘m miqdordagi jarima undirilgan. Bu nafaqat sog‘liqni saqlash va xalq ta’limi, boshqa soha vakillarida ham kuzatilgan”, — deydi vazir Nozim Husanov.

Bandlik va mehnat munosabatlari vaziri Nozim Husanov O‘zbekistonda majburiy mehnatga barham berish uchun ko‘p mehnat qilinganini ta’kidlamoqda.

“Bugungi kunga kelib xalqaro mehnat tashkiloti rasmiy hisobotida O‘zbekistonda majburiy mehnat yo‘qligi e’tirof etilmoqda. Bu quvonarli. Bunga erishish, majburiy mehnatga barham berish juda qiyin kechdi. Biroq, ming afsuslar bo‘lsinki, ayni kunda ham majburiy mehnatga yo‘l qo‘yayotgan mas’ullar borligini ko‘ryapmiz. Ularga qarshi murosasiz kurashda davom etyapmiz”, — deydi vazir.

Vazirga ko‘ra, avvalroq O‘zbekistonda majburiy mehnat borligi toki prezident Shavkat Mirziyoyev BMT minbarida tan olmagunga qadar inkor etib kelingan.

“Tan olish kerak, muhtaram prezidentimiz BMT minbarida turib, O‘zbekistonda majburiy mehnat borligini tan olib, unga qarshi kurashilishini aytmagunga qadar, biz o‘zimizda bo‘layotgan majburiy mehnatni tan olmaganmiz. Bu tan olingachgina, unga qarshi murosasiz kurashni boshladik. Hatto o‘zimiz ham talabalik paytimizda 1992—1993-yillarda paxta terganmiz. Bu muammo bor edi. Va prezidentimiz tashabbusi bilan bunga chek qo‘yildi”, — deydi vazir.

Vazir suhbat yakunida OAV vakillari va blogerlarga murojaat qilib, majburiy mehnatga yo‘l qo‘yilgan holat bo‘lsa, bu haqda vazirlikka xabar berishlari lozimligini iltimos qilib, majburiy mehnatga birgalikda barham berishga chaqirdi.