Бандлик ва меҳнат муносабатлари вазири Нозим Ҳусанов вазирликка келиб тушаётган мурожаатларнинг аксариятида меҳнат муносабатларида қонун бузилиши ва иш ҳақини ололмаслик масаласида кўмак сўралаётганини айтди. Бу ҳақда вазир вазирлик ҳузуридаги жамоатчилик кенгаши йиғилишида маълум қилди.
Нозим Ҳусановнинг маълумот беришича, 2022 йилнинг январь—июнь ойлари давомида вазирликка ижтимоий тармоқлар орқали 75 та мурожаат келиб тушган бўлиб, мазкур мурожаатларнинг аксариятида меҳнат муносабатларида қонун бузилишига йўл қўйилаётгани ва иш ҳақини олишда муаммоларга дуч келинаётгани билдирилган.
«Ижтимоий тармоқлар орқали келиб тушган мурожаатларнинг 17 тасида мурожаатчи ўз вақтида иш ҳақини ололмаётганини айтган бўлса, 14 тасида мажбурий меҳнатга йўл қўйилгани ошкор қилинган. Шунингдек, 13 та мурожаатда ишдан ташқари вақтда ишга жалб қилиш, 12 та мурожаатда меҳнат муносабатлари бузилиши, 11 та мурожаатда миграция масаласи ва 8 та ҳолатда иш вақтидан ташқари йиғилишлар ўтказилаётгани маълум қилинган», — дейди Бандлик ва меҳнат муносабатлари вазири Нозим Ҳусанов.
Вазирнинг қўшимча қилишича, ижтимоий тармоқлар орқали келиб тушган мазкур мурожаатлар ўз вақтида ўрганилиб, қисқа фурсатда ечимини топган.
Тадбирда қўшимча маълумот берилишича, йил бошидан айни кунга қадар вазирликка келиб тушган жами мурожаатлар сони эса 197 минг 66 тани ташкил қилади.
«Мазкур муаммоларнинг 74 минг 201 таси қаноатлантирилган. 110 минг 265 тасига тушунтириш берилган, 748 таси кўрмай қолдирилган. 10 минг 340 таси ўрганиш жараёнида бўлса, 617 таси рад этилган. 895 таси эса бошқа ташкилотларга йўналтирилган. Энг ачинарлиси вазирликка келиб тушган жами 197 мингта мурожаатнинг ҳам 7 минг 542 таси ҳам айнан ойлик-маошини ўз ватқида олмаслик билан боғлиқ мурожаат», — дейди вазир.
Изоҳ (0)