Buxoroda huquqni muhofaza qilish organlari bilan hamkorlikda olib borilgan tadbirlarda 2022-yilning ayni davriga qadar korrupsiyaga oid 49 ta jinoyat aniqlanib, 54 nafar mansabdor shaxs jinoiy javobgarlikka tortilgan. Ushbu jinoyatlarning aksariyati ta’lim tizimida sodir etilgani ochiqlandi. Bu haqda “Daryo”ga Bosh prokuratura huzuridagi Iqtisodiy jinoyatlarga qarshi kurashish departamentning viloyat boshqarmasi katta inspektori Nodir Po‘latov ma’lum qildi.
Ta’kidlanishicha, fosh etilgan korrupsiyaviy jinoyatlarning 8 tasi sog‘liqni saqlash tizimida, 6 tasi kadastr va yer sohasida, 6 tasi xalq ta’limi, 3 tasi oliy ta’lim, 3 tasi maktabgacha ta’lim, 3 tasi o‘rta maxsus ta’lim, 2 tasi bank tizimi va 18 tasi boshqa sohalarda sodir etilgan.“O‘tgan 2021-yilda 95 ta korrupsion jinoyatlar aniqlanib, 104 nafar shaxs jinoiy javobgarlikka tortilgan edi. Biroq joriy yilda aynan ta’lim sohasida korrupsiya ko‘rsatkichi yuqoriligicha qolmoqda. Achinarlisi, jinoyatlarning 65-70 foiz qismi aynan ta’lim sohasida faoliyat yuritayotgan xodimlar tomonidan sodir etilgan. Misol uchun, yaqinda departamentning viloyat boshqarmasi fuqaro M.O.ning arizasiga ko‘ra, tadbir o‘tkazdi. Olot tuman kasb-hunar maktabi mansabdor shaxslari maktabning to‘rt nafar 10-sinf o‘quvchilarini sinfdan-sinfga qoldirmaslik, ya’ni 11-sinfga o‘tkazish evaziga o‘quvchilarning har biridan 1 million so‘mdan jami 4 million so‘m pul talab qilib olgan paytda ushlangan. Holat yuzasidan Jinoyat kodeksining 210-moddasi (pora olish) 1-qismi bilan jinoyat ishi ochilib, chora ko‘rildi”, — deydi Nodir Po‘latov.
Bildirilishicha, viloyatdagi ta’lim boshqarmalariga 13 marotaba taqdimnomalar kiritilgan.
Izoh (0)