Бухорода ҳуқуқни муҳофаза қилиш органлари билан ҳамкорликда олиб борилган тадбирларда 2022 йилнинг айни даврига қадар коррупцияга оид 49 та жиноят аниқланиб, 54 нафар мансабдор шахс жиноий жавобгарликка тортилган. Ушбу жиноятларнинг аксарияти таълим тизимида содир этилгани очиқланди. Бу ҳақда «Дарё»га Бош прокуратура ҳузуридаги Иқтисодий жиноятларга қарши курашиш департаментнинг вилоят бошқармаси катта инспектори Нодир Пўлатов маълум қилди.
Таъкидланишича, фош этилган коррупциявий жиноятларнинг 8 таси соғлиқни сақлаш тизимида, 6 таси кадастр ва ер соҳасида, 6 таси халқ таълими, 3 таси олий таълим, 3 таси мактабгача таълим, 3 таси ўрта махсус таълим, 2 таси банк тизими ва 18 таси бошқа соҳаларда содир этилган.«Ўтган 2021 йилда 95 та коррупцион жиноятлар аниқланиб, 104 нафар шахс жиноий жавобгарликка тортилган эди. Бироқ жорий йилда айнан таълим соҳасида коррупция кўрсаткичи юқорилигича қолмоқда. Ачинарлиси, жиноятларнинг 65-70 фоиз қисми айнан таълим соҳасида фаолият юритаётган ходимлар томонидан содир этилган. Мисол учун, яқинда департаментнинг вилоят бошқармаси фуқаро М.О.нинг аризасига кўра, тадбир ўтказди. Олот туман касб-ҳунар мактаби мансабдор шахслари мактабнинг тўрт нафар 10-синф ўқувчиларини синфдан-синфга қолдирмаслик, яъни 11-синфга ўтказиш эвазига ўқувчиларнинг ҳар биридан 1 миллион сўмдан жами 4 миллион сўм пул талаб қилиб олган пайтда ушланган. Ҳолат юзасидан Жиноят кодексининг 210-моддаси (пора олиш) 1-қисми билан жиноят иши очилиб, чора кўрилди», — дейди Нодир Пўлатов.
Билдирилишича, вилоятдаги таълим бошқармаларига 13 маротаба тақдимномалар киритилган.
Изоҳ (0)