Qozog‘istonning Turan Times nashri bosh muharriri Gaziz Abishev Qoraqalpog‘istonda bo‘layotgan hodisalar va uning qozoq jamoatchiligi orasidagi muhokamalariga o‘z munosabatini bildirdi. Uning fikricha, mazkur holat oqibatida tashqi kuchlar ikki davlat o‘rtasida ixtilof paydo qilishga urinishi mumkin.
“Qoraqalpog‘iston voqealari ortidan tashqi kuchlar O‘zbekiston va Qozog‘iston o‘rtasida kelishmovchilik tug‘dirishga harakat qilishi mumkin. Xuddiki qozoqlar o‘zlariga yaqin bo‘lgan qoraqalpoqlardan juda xavotirda, shuningdek, O‘zbekistonni kuchsizlantirishdan manfaatdor.
Tan olish kerak, oq-qora fikrli, Qozog‘istonning milliy davlat manfaati nima ekanini tushunmaydigan qozoq divan qahramonlarimiz bu olovga o‘tin tashlamoqda.
Ostona va Toshkent o‘rtasida yuzaga kelishi mumkin bo‘lgan janjal “bo‘lib tashlab, hukmronlik qil” tamoyilida ish ko‘radigan, mintaqada o‘z ta’sirini kuchaytirmoqchi bo‘lgan tashqi o‘yinchilar uchun, albatta, foydali bo‘ladi.
Lekin hozirda ikki davlat o‘rtasida barcha muhim diplomatik darajalarda konstruktiv muloqot olib borilmoqda. O‘zbekiston Qozog‘iston har qanday vaziyatda ham nizolarni tinch yo‘l bilan hal qilishga chaqirib, pirovardida qo‘shnilarining hududiy yaxlitligi tarafdori ekanini yaxshi biladi. Va O‘zbekiston Respublikasining hozirgi ko‘rinishdagi suverenitetiga qarshi hech qanday chora ko‘rilmaydi”, — degan u Telegram messenjeridagi kanalida.
Uning ta’kidlashicha, ijtimoiy tarmoqlarning qozoq segmentida Qoraqalpog‘istondagi voqealar haqida ma’lumot oladigan o‘quvchi quyidagilarni bilib olishi kerak:
- Qozog‘istonning tashqi siyosati mamlakat prezidenti tomonidan belgilanadi va faqat u vakolat bergan shaxslar tomonidan ifodalanadi;
- Qoraqalpog‘iston — O‘zbekistonning ichki ishi;
- Qozog‘iston boshqa davlatlarning hududiy yaxlitligi tamoyiliga amal qiladi, xususan, O‘zbekistonning to‘liq suvereniteti va hududiy yaxlitligini qo‘llab-quvvatlaydi;
- Qozog‘iston O‘zbekistondagi referendumning har qanday natijasini qo‘llab-quvvatlaydi.
2-iyul kuni Shavkat Mirziyoyev Nukusga kelib, deputatlar, Qoraqalpog‘iston faxriylari va faollari bilan uchrashuv o‘tkazdi. Davlat rahbari Konstitutsiyaning Qoraqalpog‘istonga tegishli moddalarini amaldagi tahrirda o‘zgarishsiz qoldirish zarurligini aytdi. “Konstitutsiyaviy qonun loyihasi referendumdan keyingina qonuniy tusga kirishini bildirib, fuqarolarning xohish-irodasi, taklif va fikrlaridan kelib chiqqan holda, ushbu loyiha o‘zgarishini va takomiliga yetkazilishini qayd etgan.
Shavkat Mirziyoyev farmoni bilan fuqarolarning xavfsizligini ta’minlash, ularning huquq va erkinliklarini himoya qilish, qonuniylik va huquq-tartibotni tiklash maqsadida Qoraqalpog‘iston Respublikasi hududida 2022-yil 3-iyul kuni soat 00:01 dan 2022-yil 2-avgust kuni soat 00:00 ga qadar bo‘lgan davrda favqulodda holat joriy etildi.
Prezident 3-iyul, yakshanba kuni yana Nukusga uchib ketdi. U yerda videoselektor yig‘ilishi o‘tkazilib, barcha tumanlar bilan muloqot qilingan. Tuman hokimlari va huquqni muhofaza qiluvchi organlar rahbarlari fuqarolarning xavfsizligini ta’minlash, qonuniylik va huquq-tartibotni mustahkamlash bo‘yicha ko‘rilayotgan chora-tadbirlar yuzasidan axborot bergan. Qayd etilishicha, davlat rahbarining murojaatidan keyin vaziyat barqarorlashgan, hayot o‘z maromiga qaytmoqda.
Izoh (0)