Qashqadaryoda harbiy xizmatga chaqirilganidan 50 kun o‘tib vafot etgan askar voqeasi bo‘yicha jinoyat ishi qo‘zg‘atildi, deb xabar bermoqda “Kun.uz”.
Qayd etilishicha, holat yuzasidan Jinoyat kodeksining 116-moddasi 3-qismi (kasb yuzasidan o‘z vazifalarini lozim darajada bajarmaslikda ifodalangan ehtiyotsizlik oqibatida inson o‘limiga sababchi bo‘lish) bilan shifokorlarga nisbatan ish qo‘zg‘atilgan. Holat bo‘yicha Qarshi harbiy prokuraturasi dastlabki tergovni boshlagan.
Eslatib o‘tamiz, ushbu nashrda “Ikki oy oldin armiyaga kuzatilgan yigit yurak xurujidan o‘lgani aytilmoqda, marhumning yaqinlari bunga ishonmayapti” sarlavhali maqola e’lon qilingandi. Unda 8-aprel kuni armiya safiga ketgan Ruslan Qidiraliyev 29-may kuni vafot etgani aytilgan. Sud-tibbiy ekspertizasining dastlabki xulosasida 18 yashar askarning o‘limiga “yurakning surunkali ishemik kasalligi, yurak gipertrofiyasi, kardioskleroz, aorta va yurak toj tomirlari aterosklerozi sabab bo‘lgani, ekspertiza tekshiruvi jarayonida marhumda o‘tkir yurak va qon-tomirlari yetishmovchiligi, bosh miya va o‘pka shishi ko‘rinishidagi kasalliklar asoratlari aniqlangani qayd etilgan.
Biroq marhumning yaqinlari bunga ishonishmayapti. Marhumning ota-onasi agar yigitda qandaydir surunkali kasallik bo‘lganida bu tibbiy ko‘riklar vaqtida aniqlanar va uni harbiy xizmatga olishmagan bo‘lardi, degan fikrda.
Mudofaa vazirligi holat yuzasidan Qarshi harbiy prokuraturasi tomonidan tergovga qadar tekshiruv harakatlari olib borilayotganini, Bosh prokuror matbuot kotibi Hayot Shamsutdinov “holat sinchkovlik bilan, har tomonlama, to‘la va xolisona tekshirib chiqilishi va natijasi bo‘yicha qo‘shimcha xabar qilinishi”ni ma’lum qilgandi.
Sodir etilgan jinoyat ishi bo‘yicha tegishli ekspertizalar tayinlangan. Ekspertiza Respublika idoralari tomonidan o‘tkazilishi belgilangan. Ekspertiza chog‘ida Sud-tibbiy ekspertizasining dastlabki xulosasi nechog‘li to‘g‘ri ekaniga ham baho beriladi.
Izoh (0)