Қашқадарёда ҳарбий хизматга борган 18 ёшли йигит уйига ўлик ҳолда қайтгани юзасидан жиноят иши қўзғатилди

Қашқадарёда ҳарбий хизматга чақирилганидан 50 кун ўтиб вафот этган аскар воқеаси бўйича жиноят иши қўзғатилди, деб хабар бермоқда «Kun.uz».

Қайд этилишича, ҳолат юзасидан Жиноят кодексининг 116-моддаси 3-қисми (касб юзасидан ўз вазифаларини лозим даражада бажармасликда ифодаланган эҳтиётсизлик оқибатида инсон ўлимига сабабчи бўлиш) билан шифокорларга нисбатан иш қўзғатилган. Ҳолат бўйича Қарши ҳарбий прокуратураси дастлабки терговни бошлаган.

Эслатиб ўтамиз, ушбу нашрда «Икки ой олдин армияга кузатилган йигит юрак хуружидан ўлгани айтилмоқда, марҳумнинг яқинлари бунга ишонмаяпти» сарлавҳали мақола эълон қилинганди. Унда 8 апрель куни армия сафига кетган Руслан Қидиралиев 29 май куни вафот этгани айтилган. Суд-тиббий экспертизасининг дастлабки хулосасида 18 яшар аскарнинг ўлимига «юракнинг сурункали ишемик касаллиги, юрак гипертрофияси, кардиосклероз, аорта ва юрак тож томирлари атеросклерози сабаб бўлгани, экспертиза текшируви жараёнида марҳумда ўткир юрак ва қон-томирлари етишмовчилиги, бош мия ва ўпка шиши кўринишидаги касалликлар асоратлари аниқлангани қайд этилган.

Бироқ марҳумнинг яқинлари бунга ишонишмаяпти. Марҳумнинг ота-онаси агар йигитда қандайдир сурункали касаллик бўлганида бу тиббий кўриклар вақтида аниқланар ва уни ҳарбий хизматга олишмаган бўларди, деган фикрда.

Мудофаа вазирлиги ҳолат юзасидан Қарши ҳарбий прокуратураси томонидан терговга қадар текширув ҳаракатлари олиб борилаётганини, Бош прокурор матбуот котиби Ҳаёт Шамсутдинов «ҳолат синчковлик билан, ҳар томонлама, тўла ва холисона текшириб чиқилиши ва натижаси бўйича қўшимча хабар қилиниши»ни маълум қилганди.

Содир этилган жиноят иши бўйича тегишли экспертизалар тайинланган. Экспертиза Республика идоралари томонидан ўтказилиши белгиланган. Экспертиза чоғида Суд-тиббий экспертизасининг дастлабки хулосаси нечоғли тўғри эканига ҳам баҳо берилади.