Zakovatchilardan dasturchilargacha. “Yangi O‘zbekiston” bog‘ida tashkil qilingan 8 ta pavilyondan reportaj

Kecha, 30-iyun kuni “Yangi O‘zbekiston” bog‘ida yoshlar kuni munosabati bilan turli tadbirlar tashkil qilindi. Bu safargi tadbirning avvalgilaridan farqi bog‘da 8 ta pavilyonlar tashkil qilindi. Xususan:

• “Amir Temur” (shaxmat) pavilyoni
• “Mirzo Ulug‘bek” (zakovat) pavilyoni
• “Al-Xorazmiy” (IT) pavilyoni
• “Alisher Navoiy” (jadidchilar yangi avlodi, o‘zbek va xorijiy tillar) pavilyoni
• “Zahiriddin Muhammad Bobur” (kitobxonlik) pavilyoni
• Bo‘zatov “Yoshlar ovozi” pavilyoni
• “Jaloliddin Manguberdi” (sport) pavilyoni
• “Yosh tadbirkorlar va hunarmandlar” pavilyoni.

Xususan, davlat rahbari shaxmat pavilyonida Prezident maktabi bitiruvchilari hamda xorijda tahsil olayotgan bitiruvchi bilan suhbat qildi.

Zakovat pavilyonida esa “Zakovat intellektual klubi” nodavlat notijorat tashkilotlari faoliyati yuzasidan taqdimot o‘tkazildi.

Shavkat Mirziyoyev keyinroq o‘z nutqida zakovatchilar bilan yangi rejalar haqida gaplashib olganini aytdi. “Birinchi tashabbusni Xorazmdan boshlaydigan bo‘ldik, ertaga Xorazm viloyati hokimi kerakli topshiriqlarni oladi”, — deydi prezident.

“Mahallalardagi yoshlar yetakchilari endi har bir ko‘cha kesimida kitobxonlik, “Zakovat” va boshqa intellektual o‘yinlarni yo‘lga qo‘yadi. Bunday tanlovlar har haftada – mahalla kesimida, har oyda – tuman miqyosida va har chorakda viloyat darajasida o‘tkazib borilishi kerak. Bu orqali 2 millionga yaqin yoshlar qamrab olinadi”, — deya qo‘shimcha qildi Shavkat Mirziyoyev.

IT pavilyonida esa “Tumaris.Tech” va “Bir million dasturchi” loyihalari taqdimoti o‘tkazildi.

“Alisher Navoiy” pavilyonida esa “WikiStipendiya” marafoni, “Ibrat” tillar oromgohi, “Mitti koinot” bolalar uchun o‘zbek tilidagi animatsion filmlar va videokontentlar festivali, “Маtn.uz” platformasi loyihalari bo‘yicha taqdimot qilindi.

Prezident o‘z nutqida vikipediyada o‘zbek tilidagi maqolalar sonini 100 mingtaga yetkazish va xorijiy tillarda ham O‘zbekiston haqidagi ma’lumotlarni joylashtirish yaxshi samara berishi haqida aytdi. Shavkat Mirziyoyevning so‘zlariga ko‘ra, ushbu maqsadlar uchun 10 milliard so‘m mablag‘ yo‘naltiriladi.

Kitobxonlik pavilyonida esa yoshlar o‘rtasida kitobxonlikni targ‘ib qilish borasida amalga oshirilayotgan ishlar yuzasidan suhbat o‘tkazildi.

Bo‘zatov “Yoshlar ovozi” pavilyonida “Yoshlar ovozi” tanlovi yakunlari hamda yosh ijodkorlarni kashf etish bo‘yicha suhbat bo‘lib o‘tdi.

Sport pavilyonida esa xalqaro va respublika darajasidagi sportchilar bilan qisqa uchrashuvlar bo‘ldi.

So‘nggi, “Yosh tadbirkorlar va hunarmandlar” pavilyonida yangi startap loyihalar taqdimoti o‘tkazildi.