AQSH moliya vazirligining xorijiy aktivlar nazorati boshqarmasi (OFAC) rossiyalik biznesmen Suleyman Kerimovga aloqador Heritage trastini bloklab qo‘ydi. Bu haqda AQSH moliya vazirligining rasmiy saytida xabar qilingan.
Delaver shtatida ro‘yxatdan o‘tgan trast Kerimovning AQSHdagi aktivlarini boshqaradi va ularning umumiy qiymati 1 milliard dollardan oshadi, deya axborot bergan OFAC.
Heritage Trust 2017-yilda Suleyman Kerimov AQSH sanksiyalari ro‘yxatiga kirishidan avval tuzilgan. Trastga mablag‘lar Kerimovga aloqador ikki xorij kompaniyasi orqali kiritilgan.
AQSH moliya vazirligining qayd etishicha, keyinchalik ushbu mablag‘lar mamlakatning davlat va nodavlat kompaniyalariga investitsiya sifatida kiritilgan, qator investitsiya firmalari hamda vositachilar orqali boshqarilgan.
Vazirlik ma’lumotida Kerimov va uning ishonchli odamlari kelishuvlarni amalga oshirish, shu bilan birga trastga aloqador ekanini yashirish uchun yollanma kompaniyalardan foydalanib kelgani yozilgan.
Kerimovning Heritage Trust’ga aloqadorligini aniqlash uchun keng miqyosdagi tergov-surishtiruv ishlari olib borilgan, deya ta’kidlangan AQSH moliya vazirligining bayonotida.
2021-yilda Rossiya Forbes Suleyman Kerimov hamda uning oilasi boyligini 15,8 milliard dollarga (Rossiyaning eng boy biznesmenlari ro‘yxatida 10-o‘rin) baholagan. 2008-yildan beri Dog‘istonda Federatsiya kengashi a’zosi bo‘lib siyosiy karyerasini olib borayotgan Kerimov va uning oilasi “Polyus” oltin sanoati kompaniyasining asosiy egalari hisoblanadi.
Kerimov 2018-yildan beri AQSH sanksiyalari ro‘yxatida turibdi. U mazkur “qora ro‘yxat”ga Putinga yaqin bo‘lgan amaldorlar va biznesmenlar safida bo‘lgani uchun kiritilgan.
Izoh (0)