Ketanji Braun Jekson 30-iyun kuni AQSH Oliy sudi a’zosi sifatida qasamyod qabul qildi va Qo‘shma Shtatlar tarixida mazkur lavozimni egallagan birinchi afroamerikalik ayolga aylandi. CNN telekanali qasamyod marosimini to‘g‘ridan to‘g‘ri translyatsiya qilgan.
AQSH vakillar palatasi spikeri Nensi Pelosi Jeksonning qasamyodiga sharh berib, tvit yozdi.
“Xalqimizning oliy ideallari va maqsadlarini amalga oshirish uchun tarixiy qadam tashladik”.
Ketanji Braun Jekson avval Kolumbiya okrugi appelyatsiya sudining sudyasi edi. U AQSH Oliy sudi sudyasi lavozimida o‘z vakolatlarini topshirgan 83 yoshli Stiven Brayerni almashtirdi.
AQSH Oliy sudida jami 9 nafar sudya o‘rni mavjud. Ular umrbod muddatga saylanadi, lekin o‘z xohishiga ko‘ra vakolatlardan voz kechishi mumkin. Oliy sud sudyaligiga nomzodlarni AQSHning amaldagi prezidenti taklif etadi. Sudyalar davlat rahbarining vakolatlari tugaganidan keyin ham uzoq vaqt davomida Oliy sudda qolishi tufayli, mazkur lavozimga nomzod taqdim etib, tayinlovda ishtirok etish AQSH prezidentlari uchun siyosiy tomondan o‘ziga xos merosga aylanadigan harakat sifatida e’tirof qilinadi.
Avval Fransiyada “Olg‘a, Respublika” partiyasi a’zosi Yael Braun-Pive mamlakat tarixida Milliy majlis spikeri lavozimini egallagan birinchi ayol rahbarga aylangandi.
Izoh (0)