Yoshlar oyligi doirasida Andijon shahrida 80 mingdan ortiq yoshlar ishtirok etgan “Open air” yoshlar forumi o‘tkazildi. Tadbirda Andijon viloyati hokimi Shuhrat Abdurahmonov rejissyor va qiziqchi G‘ayrat Ahmedovga “Andijon polkasi” haqida olgan videoroligi uchun Spark avtomobili sovg‘a qildi. Bu haqda “Daryo” muxbiri Umidjon Mamarasulov xabar bermoqda.
Yoshlar oyligi doirasida “Yangi O‘zbekiston yoshlari birlashaylik” shiori ostida Andijon viloyatining barcha shahar va tumanlarida kitobxonlik va ko‘ngilochar tadbirlar, sport musobaqalari, konsert tomoshalari o‘tkazilgan. Yoshlar oyligi viloyat markazida tashkil etilgan “Open air” tadbiri bilan yakunlangan. Unda 80 mingdan ziyod yoshlar ishtirok etgan.
Tadbirda viloyat hokimligi tomonidan faollar, turli sohalarda yuqori natijalarga erishayotgan yoshlar taqdirlanib, mahalla yoshlariga kelgusida bunyod etiladigan sport maydonchalari va zamonaviy texnikalar uchun sertifikatlar topshirilgan. Shuningdek, shu kuni “Andijon polkasi”ning 100 yilligi munosabati bilan ushbu raqsning targ‘iboti va ommalashuvi uchun o‘tkazilgan fleshmob tadbirida o‘z videoroligi bilan qatnashgan rejissyor va qiziqchi G‘ayrat Ahmedov Spark avtomobili bilan taqdirlangan.
Ta’kidlanishicha, forumda Qoraqalpog‘iston Respublikasining Kegeyli tumanidan kelgan, turli sohalarda muvaffaqiyatlarga erishgan, ilm-ma’rifat, adabiyot, san’at, kasb-hunar, sport sohalarida qo‘lga kiritgan yutuq va marralari bilan tengdoshlariga ibrat bo‘layotgan 200 nafarga yaqin yoshlar va jamoatchilik vakillari ham ishtirok etgan.
Izoh (0)