Avval xabar berilganidek, 25-iyun kuni O‘zbekiston Konstitutsiyasiga o‘zgartishlar kiritish to‘g‘risidagi qonun loyihasi jamoatchilik muhokamasiga qo‘yildi.
Unga ko‘ra, Konstitutsiyaga kiritilayotgan muhim o‘zgartishlardan biri majburiy mehnat va bolalar mehnatining taqiqlanishi bilan bog‘liq.
“Majburiy mehnatdan va bolalar mehnatining eng yomon shakllaridan foydalanish taqiqlanadi hamda qonunga binoan javobgarlikka sabab bo‘ladi” (37-modda).
Prezident Shavkat Mirziyoyev Konstitutsiyaning 29-yilligiga bag‘ishlangan bayram tadbirida yo‘llagan tabrigida asosiy qonunga to‘qqizta yo‘nalishda o‘zgartirishlar kiritishni taklif qilgan holda, Konstitutsiyada bolalar mehnatiga yo‘l qo‘ymaslik masalasini alohida yo‘nalish sifatida qayd etdilar.
Ushbu taklif 20 iyun kuni Konstitutsiyaviy komissiya a’zolari bilan uchrashuvi doirasida ham takror yangradi. Shuningdek, Yangi O‘zbekiston taraqqiyot strategiyasining mamlakatda yangi ish o‘rinlari yaratish, aholi daromadlarini oshirish va shu orqali 2026 yil yakuniga qadar kambag‘allikni kamida 2 baravarga qisqartirishga bag‘ishlangan 85-maqsadi doirasida “norasmiy ishlayotgan 2,5 million nafar fuqaroning bandligini legallashtirishga yordam berish orqali ularda ijtimoiy kafolat va imtiyozlardan to‘liq foydalanish imkoniyatini yaratish” vazifalari belgilangan.
O‘zbekistonda bolalarning majburiy mehnati tugatilgani haqida xalqaro hamjamiyat tomonidan e’tirof etilgani juda muhim ahamiyatga ega. O‘zbekiston qo‘shilgan XMT “Bolalar mehnatining eng yomon shakllari to‘g‘risidagi” 182-son-Konvensiyaning normalarining ijrosi ta’minlandi. 2019 yilning 1 aprel kuni Bryussel shahrida e’lon qilingan Xalqaro mehnat tashkilotining hisobotida Jahon banki tomonidan O‘zbekiston paxta sanoatida bolalar va majburiy mehnatdan tizimli foydalanishga barham berilgani e’tirof etildi.
O‘zbekiston Respublikasi “Bola huquqlari kafolatlari to‘g‘risida”gi qonunida, shuningdek, Mehnat kodeksida, Ma’muriy javobgarlik to‘g‘risidagi kodeksda bolalar mehnatini taqiqlovchi normalari mustahkamlangan.
Kiritilayotgan o‘zgartirish yoki qo‘shimchalar barcha mehnatkashlarning mehnat sharoitlarini yaxshilash uchun huquqiy asos bo‘ladi. Eng muhimi, norasmiy mehnat munosabatlarini legallashtirishga imkon yaratiladi.
Izoh (0)