“O‘zbekiston qoraqalpoq o‘zligiga, tiliga va madaniyatiga bosim qilmagan va qilish niyati ham yo‘q!”. Siyosatshunos Kamoliddin Rabbimov Konstitutsiyaning 70-75-moddalarini o‘zgartirish taklifi bo‘yicha fikr bildirdi

Siyosatshunos Kamoliddin Rabbimov Konstitutsiyaning 70—75-moddalarini o‘zgartirish taklifi bo‘yicha o‘z fikrlarini bildirib o‘tdi.

“Konstitutsiyamizning 70-75 moddalarini o‘zgartirish taklifi, ba’zi qoraqalpoq do‘stlarimizda – qardoshlarimizda ma’lum xavotirlarga sabab bo‘libdi. Men har doim mintaqada integratsiya, birlashuv tarafdori bo‘lganman. O‘zbekistonni Qozog‘iston, Tojikiston, Turkmaniston va Qirg‘iziston bilan, qolaversa, Ozarbayjon va Turkiya bilan strategik yaqinlashuvi, ittifoqchiligi, birligi tarafdori bo‘lganman!

O‘zbekistonni davlat tuzilmasi, sobiq SSSR davrida, ongli ravishda ziddiyatlar bilan rasmiylashtirilgan edi. O‘zbekiston, o‘zbeklar tarixda hech qachon qoraqalpoq jigarlarimizga jabr-zulm qilmagan. Aksincha, tarixda qoraqalpoq jigarlarimizning ajdodlariga jabr-zulm bo‘lganda, Xorazm xonlari bu jigarlarimizni asrab qolishgan edi.

Bugun ham O‘zbekiston qoraqalpoq jigarlarimiz o‘zligini saqlab, rivojlantirish yo‘lidan ketyapti. Biz, bir bir millat, bir davlatmiz! Taklif qilinayotgan o‘zgarish – ushbu bir xalqni, qardoshlikni, jondoshlikni orasiga raxna solishi mumkin bo‘lgan tashqi kuchlarga fitnalar uchun imkon bermaslik niyatida bo‘lyapti. O‘zbekiston qoraqalpoq o‘zligiga, tiliga va madaniyatiga bosim qilmagan va qilish niyati ham yo‘q!

Postsovet hududida bo‘layotgan provokatsiyalarni ko‘rib turib, bu masalada birligimizga qarshi bo‘lgan tashqi kuchlarga imkon bermaslik kerak. Asossiz xavotir olayotgan qardoshlarimizga murojaatim shuki, globallashgan dunyoda, O‘zbekiston qoraqalpoq o‘zligiga, tili va madaniyatiga bo‘lgan hurmat-ehtirom, bo‘lgan va oshib boradi”, — deb yozdi Kamoliddin Rabbimov Telegram’dagi o‘z kanalida.