Bokschi Fyodor Chudinov (25-3-1, 17 KO) o‘rta vazn toifasida sobiq WBC Silver chempioni Azizbek Abdug‘ofurovga (14-1, 5 KO) qarshi revansh jangini o‘tkazishni rejalashtirmoqda. Bu haqda rossiyalik sportchining murabbiyi Vitaliy Slanovga tayanib, “TASS” xabar qilmoqda.
“1-iyuldan tayyorgarliklarni boshlaymiz. Abdug‘ofurovdan revansh olmoqchimiz. Jang sentabr oyida bo‘lib o‘tishi mumkin”, — deydi Slanov.
Azizbek Abdug‘ofurov va Fyodor Chudinov o‘rtasidagi jang 30-aprel kuni Rossiyaning Krasnogorsk shahrida bo‘lib o‘tgandi. To‘liq 10 raund davom etgan jangda Azizbek hakamlar qarori bilan (97-92, 98-91, 97-92) g‘alaba qozongandi.
Eslatib o‘tamiz, Abdug‘ofurov Chudinovga qarshi ringga chiqishdan oldin 2021-yil mart oyida WBC Silver kamari himoyasi uchun jang o‘tkazgan edi. Rossiyalik Pavel Silyaginga (7-0, 4 KO) qarshi kechgan boks oqshomida Azizbek ilk mag‘lubiyatini qabul qilib, kamarni boy bergandi.
Izoh (0)