Neymar yozda “PSJ”ni tark etishi mumkin.
Fransuz klubi 30 yoshli futbolchi bilan xayrlashishga tayyor. “PSJ” Neymarni sotish yoki ijaraga olish bo‘yicha istalgan takliflarni ko‘rib chiqmoqchi.
Parijliklar hatto braziliyalikni boshqa klubning bir necha futbolchisiga almashtirishga ham tayyor, deya xabar beradi jurnalist Marselo Bexler. Shu bilan birga “PSJ” Neymarga xayrlashishni xohlayotganini to‘g‘ridan to‘g‘ri aytgani yo‘q.
Futbolchini boshqa jamoaga o‘tkazish qiyin bo‘ladi. Uning maoshi juda katta to‘siq bo‘lishi mumkin. U Fransiyada yiliga 35 million yevro maosh oladi. Hozirda ushbu maoshni to‘laydigan jamoaning o‘zi yo‘q.
Braziliyalikning o‘zi “PSJ”ni tark etishni istamayapti. U JCH—2022 ga tayyorlanish uchun o‘zi moslashgan jamoada bo‘lishni xohlamoqda. Undan tashqari olayotgan yuqori maoshi ham klubni tark etmasligiga sabablardan biri bo‘lishi mumkin.
“Barselona” bir necha bor Neymarni qaytarishga urinib ko‘rdi. Ammo endi moliyaviy muammolar sabab kataloniyaliklar futbolchini ortga qaytara olmaydi. Faqatgina ingliz klublari Neymarni o‘z safiga qo‘shib olishi mumkin.
Xabar qilinishicha, Neymar jamoani tark etadigan bo‘lsa, “PSJ” “Barselona”dan Usmon Dembeleni olib keladi. Avvalroq, “Barselona”ga futbolchini 50 mln yevroga sotib olish taklif qilingani xabar qilingandi.
Neymar 2017-yildan buyon parijliklar sharafini himoya qilib keladi. “PSJ” hujumchi uchun “Barselona”ga 222 million yevro to‘lab bergan edi. Braziliyalikning amaldagi shartnomasi 2025-yilda o‘z nihoyasiga yetadi.
Braziliyalik 2021/22-yilgi mavsum “PSJ” safida barcha musobaqalarda 28 ta o‘yinda ishtirok etib, 13 ta gol va 8 ta golli uzatmaga mualliflik qildi.
Izoh (0)