Ijtimoiy tarmoqlarda qat’iy karantin choralari yana kuchaytirilishi, virusning yangi shtammlari tarqalayotgani, shifoxonalarda “oyoq bosishga joy yo‘q”ligi haqidagi audioyozuvlar tarqalmoqda. Sanitariya-epidemiologik osoyishtalik va jamoat salomatligi xizmati boshlig‘i o‘rinbosari, tibbiyot fanlari doktori, professor Nurmat Otabekov mazkur holatga munosabat bildirdi.
“Bu audioyozuvlarlarni tinglab ko‘rsangiz, ular sizga tanish tuyuladi. Chunki ushbu xabarlar kasallik avj olgan o‘tgan yilgi pandemiya davrida ham o‘rtaga chiqqan edi. Buni ulardagi leksika va umumiy manzaradan ham sezish qiyin emas.
Deylik, bu xabarlardan birida virusning yangi shtammi tarqalib ketgani haqida so‘z boradi. Holbuki, ayni paytda yurtimizda koronavirusning asosan omikron shtammi aniqlanmoqda. Bu bemorlarning 98 foizida kasallik yengil darajada kechyapti. Mazkur shtammning yurtimizda tarqala boshlaganiga esa yarim yilga yaqinlashyapti”, — deydi Otabekov.
Uning so‘zlariga ko‘ra, Sog‘liqni saqlash vazirligi va Sanitariya-epidemiologik osoyishtalik va jamoat salomatligi xizmati rasmiy manbalarida koronavirusning tarqalishi bo‘yicha so‘nggi yangiliklar berib borilmoqda. Mamlakatda bir kunda o‘rtacha 100-120 ta kasallanish qayd etilmoqda. Ta’kidlanishicha, 35 million aholi orasida — bu juda kichik ko‘rsatkich.
“Shunday bo‘lsa-da, COVID-19 ga chalinmaslikning asosiy va eng samarali yo‘li vaksinatsiya bo‘lib turibdi. 2 yoki 3 bosqichli emlashni qabul qilgan fuqarolar 6 oydan so‘ng buster dozani olishlari, shundan 6 oy o‘tib, yana qayta emlanishlari mumkin. Yuqoridagi asossiz xabarlarni tarqatayotgan kimsalar aholi orasida xavotir uyg‘otishga harakat qilayotgani ko‘rinib turibdi. Shu bois fuqarolardan ijtimoiy tarmoqlardagi axborotlarni sog‘lom aql bilan baholashlarini, ularni tarqatayotganda asosliligini tekshirib ko‘rishlarini so‘raymiz”, — deya qayd etadi mutaxassis.
Eslatib o‘tamiz, 23-iyun kuni Sanitariya-epidemiologik osoyishtalik va jamoat salomatligi xizmati boshlig‘i Bahodir Yusupaliyev O‘zbekistonda koronavirus omikron shtammining eng yuqumli deb aytilayotgan Stealth-Omicron BA.2 varianti aniqlanganini ma’lum qilgandi. Mamlakatda koronavirus infeksiyasi bilan kasallanish holati bir necha kundan buyon ortmoqda. Xususan, 25-iyunda 139 kishida, 24-iyunda — 119 kishida, 22-iyunda — 98 kishida, 19-iyunda — 93 kishida kasallik qayd etilgan.
Nurmat Otabekovning so‘zlariga ko‘ra, O‘zbekistonda asosan 20—29 yoshdagi fuqarolar orasida kasallanish holati kuzatilmoqda. Bu yosh toifasidagi bemorlar umumiy ro‘yxatga olinganlarning chorak qismini tashkil etadi.
Izoh (0)