Ижтимоий тармоқларда Сурхондарё вилояти ҳокими Тўра Боболов иштирокидаги «Биронтанг интернетга чиқарма», деб номланган видео тарқалди. Сурхондарё вилояти ҳокимлиги ахборот хизмати мазкур ҳолатга изоҳ бериб, воқеа жойини аниқлаштирди.
«Мазкур видео куни-кеча никоҳ тўйи бўлиб ўтган ‘Токио–2020’ Паралимпия ўйинлари олтин медали соҳибаси Гулжаной Наимова хонадонида тасвирга олинган. Вилоят ҳокими машҳур пара-таэквондочи Гулжаной Наимовани табриклаш учун туман ҳокими билан бирга унинг уйига борганида ҳақиқатан ҳам уч-тўрт нафар ёшларнинг жараённи телефонда тасвирга олишни бошлаганини кўриб, уларга ‘Биронтанг интернетга чиқарма’, дея мурожаат қилган. Чунки, воҳада вилоят ҳокимининг амалга ошираётган ишлари ва ҳар бир хатти-ҳаракатини ижтимоий тармоққа чиқариб, PR ясаш одатий ҳолга айланди», — дейилади ҳокимлик маълумотида.
Ҳокимлик ҳоким пиари билан боғлиқ маълумотлар ўз вақтида жамоатчиликка етказиб турилганини маълум қилиб, Тўра Боболовнинг хайрли амаллари ҳар доим ҳам жамоатчиликка ошкор қилинмаслигини ёзмоқда.
«Оммавий ахборот воситалари ва ижтимоий тармоқда ўзини кўп реклама қилишдан истиҳола қиладиган ҳоким вилоятда бажараётган айрим хайрли ишларини кенг жамоатчиликка кўрсатишдан тийилиб туради. Лозим бўлган ҳолларда ижтимоий тармоқ орқали ўзи ҳам чиқишлар қилиб, воқеа-ҳодисаларни халқимизга етказаётганини барча яхши билади. Мезбонларга бу гап ана шу маънода айтилган бўлиб, уни ижтимоий тармоқ фойдаланувчилари бошқа йўсинда талқин қилиши миллий қадриятларимиз ва инсонийлик фазилатларимизга тўғри келмайди. Аслида ҳам ‘Токио–2020’ Паралимпия ўйинларида ғолиблик шоҳсупасига кўтарилиб, вилоятимиз, мамлакатимиз довруғини дунёга кенг тараннум этган Гулжаҳон Наимова сурхондарёликлар фахрига айланди. Вилоят ҳокими ана шундай шижоаткор йигит-қизларнинг қувончли кунларига шерик бўлиб, уларга мотивация беришни ўз бурчи, деб билади», — дейилади ҳокимлик расмий муносабатида.
Изоҳ (0)