Ijtimoiy tarmoqlarda Samarqand viloyatining Ishtixon tumanida ayol “samosud” qilingani aytilgan video tarqaldi. Video muallifi jamoatchilikka murojaat qilib, opasini bo‘ynidan bo‘g‘ib o‘ldirgani va boshini yorganini aytgan. Shuningdek, videoda tibbiyot va IIB xodimlari ayolga yordam ko‘rsatishga urinayotgani tasvirlangan.
Holat yuzasidan “Daryo” muxbiri olib borgan dastlabki surishtiruvga ko‘ra, voqea 2022-yilning 25-iyun kuni sodir bo‘lgan.
Bemor yaqinlarining ma’lum qilishicha, ayolni o‘sha kuni tungi soat 21:00 atrofida uzumzorda qo‘shnisi T.S. hamda kuyovi O.X. urib, unga tan jarohati yetkazgan.
Samarqand viloyat sog‘liqni saqlash boshqarmasi axborot xizmatining “Daryo”ga ma’lum qilishicha, 2022-yilning 26-iyun kuni soat 00:50 atrofida Ishtixon tumani “Sohibkor” MFY Tinibek qishlog‘ida yashovchi F.J. tuman tibbiyot birlashmasiga murojaat qilgan.
Bemorga yopiq KST, bosh miya chayqalishi, mexanik asfekdiya, boshning tepa, bo‘yin oldi, ikkala yelka, ikkala son sohalari yumshoq to‘qimalari lati, boshning tepa, bo‘yin oldi sohalarida shilinmalar tashxisi qo‘yilgan.
Ayni paytda bemor shifokorlar nazoratida bo‘lib turibdi.
Holat yuzasidan Ishtixon tuman IIB tomonidan tergovga qadar tekshiruv harakatlari olib borilmoqda. Holat tuman sektor rahbarlari nazoratiga olingan.
Avvalroq aynan Ishtixon tumanida ona va uning o‘g‘li boshqa bir ayolni “samosud” qilayotgani aks etgan video tarqalgani, holatga nisbatan esa jinoyat ishi qo‘zg‘atilgani xabar berilgandi.
Izoh (0)