Avval xabar berilganidek, 25-iyun kuni O‘zbekiston Konstitutsiyasiga o‘zgartishlar kiritish to‘g‘risidagi qonun loyihasi jamoatchilik muhokamasiga qo‘yildi.
Konstitutsiyaga kiritilayotgan o‘zgarishlarga ko‘ra intellektual mulkka bo‘lgan huquq kafolatlanmoqda.Jumladan, Konstitutsiyaning 36-moddasi quyidagicha ko‘rinish olishi ko‘zda tutilgan:
"Har kim qonun bilan muhofaza qilinadigan mulkka, shu jumladan intellektual mulkka bo‘lgan huquqqa ega".
Prezident Shavkat Mirziyoyev 2020 il 12 oktyabr kuni intellektual mulk obyektlarini muhofaza qilish tizimini takomillashtirish chora-tadbirlari yuzasidan o‘tkazilgan yig‘ilishda “Intellektual mulk masalasini davlat siyosati darajasiga ko‘tarmas ekanmiz, O‘zbekiston bundan o‘n yildan keyin ham raqobatdosh bo‘lmaydi” deb ta’kidlab, mazkur sohani rivojining asosiy ustuvor yo‘nalishini belgilab berdi.
O‘zbekiston Respublikasi Prezidentining 2022 yil 26 apreldagi PQ-221-son qarori bilan 2022-2026 yillarda O‘zbekiston Respublikasida intellektual mulk sohasini rivojlantirish Strategiyasi ham tasdiqlangan.
Zamonaviy dunyoda intellektual mulk himoyasini ta’minlash muhim ahamiyatga ega. Insonni aqliy mehnati mahsuli bo‘lgan raqamli texnologiyalar va innovatsiyalar XXI asrda mamlakat iqtisodiyotini asosiy harakatlantiruvchi kuchiga aylanmoqda. Bugungi kunda nomoddiy aktiv hisoblangan intellektual mulk kirib bormagan va ta’siriga uchramagan biror soha, tarmoq qolmadi.
Statistik ma’lumotlarga ko‘ra, nomoddiy aktivlar ulushi 1975 yilda 17 foizni tashkil etgan bo‘lsa, 2020 yilda esa 90 foizga ko‘tarilib, ularning taxminiy qiymati 21 trillion AQSH dollarini tashkil etmoqda. 2020 yilda butun dunyoni o‘z doirasiga qamrab olgan Covid-19 pandemiyasi jarayonida ham intellektual mulk obyektlarini naqadar inson hayotining ajralmas qismiga aylanib ulgurgani isbotladi. Shu bois, ushbu huquqni konstitutsiyaviy darajada e’tirofini amalga oshirmasdan turib, samarali iqtisodiy-ijtimoiy rivojlanishni ta’minlash murakkab vazifa hisoblanadi.
Izoh (0)