Ukrainaning Xerson shahriga rahbarlik qilib kelgan Igor Kolixayev qo‘lga olindi, bu haqda Xerson viloyatining harbiy-fuqarolik ma’muriyati rahbari o‘rinbosari Kirill Stremousov ma’lum qildi, deb yozadi “RBK”.
“Natsistlar orasida mer — qahramon bo‘lib hisoblanuvchi sobiq mer Kolixayev qo‘lga olindi. U denatsifikatsiya jarayonida ko‘p narsaga xalal bergan, bu jarayonlarni rad etishga chaqirgan, ochiqdan-ochiq masxara qilgan odamdir”, — dedi Stremousov.
Kolixayevning maslahatchisi Galina Lyashevskaya ma’lum qilishicha, u 28-iyun kuni ertalab, meriyaning qolgan xodimlari ishlaydigan kommunal muassasalardan biriga kelgan paytida qo‘lga olingan. Uning so‘zlariga ko‘ra, operatsiyada “Rosgvardiya” jangchilari va, ehtimol, Federal xavfsizlik xizmati xodimlari qatnashgan.
Rossiya Mudofaa vazirligi Xerson viloyati ustidan to‘liq nazorat o‘rnatilgani haqida mart o‘rtalarida e’lon qilgan edi, 9-aprelda shahar ma’muriyati binosiga Rossiya bayrog‘i o‘rnatildi. Aprel oxirida Xerson shahri va viloyatiga yangi rahbarlar tayinlandi.
O‘shanda shahar harbiy-fuqarolik ma’muriyati Kolixayev “hamkorlik qilishni istamagani”ni aytgandi. O‘tgan hafta Stremousov Ukraina sobiq meri “Xerson viloyatidagi ishlarga putur yetkazayotgani, buyruqlar chiqarayotgani” haqida shikoyat qilgandi. Uning so‘zlariga ko‘ra, Kolixayev “Ukraina hukumati vakili sifatida shaharni boshqarishda davom etmoqda”.
“Bizda hatto ba’zi tumanlarda natsistlar o‘tirib, ma’muriyatlarni boshqarmoqda. Bu natsistlarni, qo‘rquv urug‘ini sochib, vayronkor usullarni davom ettirayotgan fashizm sheriklarini tozalab tashlah uchun bizga nima xalal beryapti?” — degandi Stremousov.
24-iyun kuni Xersonda XBK mikrotumanida portlash sodir bo‘lib, oqibatda yoshlar va sport boshqarmasi boshlig‘i Dmitriy Savluchenko halok bo‘ldi. Harbiy-fuqarolik ma’muriyati hodisani terkat deb atadi.
Izoh (0)