Dunyoning yettita yetakchi demokratik mamlakatlari liderlari Germaniyadagi sammitda bayonot qabul qilib, Ukrainani uning Rossiya tajovuziga qarshi kurashda qancha kerak bo‘lsa, shuncha qo‘llab-quvvatlashga va’da berdi, deb yozadi BBC Russia.
“Biz qancha kerak bo‘lsa, shuncha moliyaviy, gumanitar, harbiy va diplomatik ko‘mak ko‘rsatamiz va Ukraina bilan yelkama-yelka turamiz”, — deyiladi AQSH, Germaniya, Yaponiya, Britaniya, Fransiya, Italiya va Kanada yetakchilari bayonotida.
“Yettilik” mamlakatlari yetakchilarining mufassal va keskin bayonotida, shuningdek, Rossiya va Belarusga nisbatan sanksiya bosimini kuchaytirishga ham va’da berilgan.
“Biz prezident Putinga va uning Belarusdagi hamtovoqlariga iqtisodiy va siyosiy bosimni saqlab turishda va kuchaytirishda davom etamiz, shu tariqa, Rossiyani Ukrainaga qarshi tajovuzkor urush olib borish uchun iqtisodiy vositalardan mahrum qilamiz, bundan keyin ham qancha zarur bo‘lsa, shuncha manzilli sanksiyalar qo‘llab, har bir bosqichda birgalikda harakat qilamiz”, — deyiladi bayonotda.
“Yettilik” mamlakatlari yetakchilari Rossiya oltiniga embargo kiritishga, sanksiyalarni aylanib o‘tishga urinishlar bilan kurashishga, Rossiya eksportiga tariflar kiritishni muvofiqlashtirishga va o‘z qonunlarini buzmagan holda ushbu tariflardan olingan mablag‘larni Ukrainaga topshirish yo‘lalrini qidirib topishga va’da bermoqda.
Bundan tashqari, G7 mamlakatlari rossiyalik siyosiy emigrantlarga yordam bermoqchi.
“Yettilik”, shuningdek, Kremldan Ukraina portlarini qamaldan chiqarib, u yerdan oziq-ovqat eksport qilishga imkoniyat yaratishni talab qildi.
Sammit ishtirokchilari bilan videoaloqa orqali Ukraina prezidenti Vladimir Zelenskiy ham suhbatlashdi. U, xususan, yana bir marta ittifoqchilardan og‘ir qurollar yetkazib berishni tezlashtirish va oshirishni so‘radi — shunda, uning so‘zlariga ko‘ra, Ukraina urushni qishgacha tugata olgan bo‘lardi.
Izoh (0)