G‘alladan bo‘shagan yerlarni nazorat qilish uchun yangi tizim ishga tushirildi

Bugungi kunda g‘alladan bo‘shagan maydonlar takroriy ekin ekish uchun aholiga ajratib berilmoqda. Bu haqda Qishloq xo‘jaligi vazirligi xabar berdi.

Ushbu jarayonlarning hisobotini avtomatlashtirish maqsadida, Agrosanoatni raqamlashtirish markazi mutaxassislari tomonidan maxsus “monitoring.agro.uz” axborot tizimi ishlab chiqildi.

Ushbu tizimda kunlik hisobotlar onlayn tarzda tuman darajasida to‘ldirilib, so‘ng respublika bo‘yicha avtomatik tarzda jamlanib boradi. Natijada hisobotlarni yuritishning shaffof mexanizmi yaratildi.

Tizim orqali g‘alladan bo‘shagan yer maydonlarining qaysi fuqarolarga ajratilayotganini nomma-nom ko‘rish imkoniyati mavjud.

Hozirgi vaqtda tizimda soha xodimlaridan 150 dan ortiq foydalanuvchi mavjud bo‘lib, ular interaktiv rejimda hisobotlarni kiritib bormoqda.

Avvalroq bug‘doydan bo‘shagan maydonlarni yoqish katta iqtisodiy zarar keltirayotgani haqida xabar berilgandi.