“Margimush qabristoni”ni Chorvoq suv omboriga xavf ekanligi to‘g‘risidagi xabarlar tarqaldi. Toshkent viloyati Ekologiya, atrof-muhitni muhofaza qilish va iqlim o‘zgarishi boshqarmasi bu tekshirilmagan, haqiqatga mos kelmaydigan hamda ayrim feyk akkauntlardan olingan yolg‘on maʼlumot ekanligini bildirdi.
Boshqarma matbuot xizmati axborotida bildirilishicha, murojaatda taʼkidlangan, Toshkent viloyati, Bo‘stonliq tumanining “Yakkatut” MFY hududida 1938—1946-yillarda sobiq “Soyuzmishyak” kombinati tomonidan 0,64 ga yer maydoniga taxminan 40 ming tonna margimush chiqindilar atrofi va ustki qismi betonlanib, havo chiqarish trubalari o‘rnatilib, ko‘milgan. Beton ustidan 70-80 santimetr qalinlikda tuproq yotqizilgan.
“Murojaatda margimush qabristoni haqida aytilgan xavotirli fikrlar 2022-yildagi holat bo‘yicha berilgan bo‘lib, bugungi kunda qabriston atrofi beton to‘siqli devorlar bilan o‘rab, konservatsiya qilingan va hudud bo‘ylab simyog‘ochlar hamda nazorat uchun kameralar o‘rnatilgan”, deyiladi boshqarma xabarida.
-Z3mms573.avif)
Qayd etilishicha, margimush tarkibli chiqindilar ko‘milgan maxsus poligonni konservatsiya qilish uchun obyektning loyiha-smeta hujjatlari ishlab chiqilib, ijobiy ekspertiza xulosalari olingan. Obyekt konservatsiyasi bo‘yicha Vazirlar Mahkamasining 2023-yil 9-avgustdagi 501-sonli farmoyishi bilan mablag‘ ajratilib, pudratchi tanlab olingan. Pudratchi bilan ikki tomonlama qiymati 3 milliard 984 million 644 ming so‘mlik shartnoma imzolangan. Ushbu shartnomaga asosan obyektni konservatsiya qilish ishlari 2024-yilda to‘liq yakunlangan.
Loyiha doirasida qabristonning ustki qismiga toza inert tuproq yotqizilgan va devor qismiga yomg‘ir va oqova suvlarini hamda nam massani o‘tkazmaslik maqsadida burg‘ilash (teshish) ishlari amalga oshirilgan va ushbu nuqtalarga kimyoviy suyuqlik kalsiy xlorid suyultirilib, yuqori bosim ostida natriy alyuminat moddasi orqali, yaʼni yerosti ukoli qilish ishlari amalga oshirilgan.
Shuningdek, Chiqindilarni boshqarish va sirkulyar iqtisodiyotni rivojlantirish agentligi, Toshkent viloyati Ekologiya, atrof-muhitni muhofaza qilish va iqlim o‘zgarishi boshqarmasi hamda tegishli tashkilot xodimlari bilan hamkorlikda har chorakda rejaviy suv, tuproq namunalarini olib nazorat monitoring tadbirlari o‘tkazilib borishi tashkil etilgan.
Shuningdek, mazkur hududlarda o‘rganish jarayonida qabristonlarning radioaktiv fon darajasini aniqlash uchun maxsus asboblardan foydalanilib, radioaktiv fon darajasi mazkur obyektda tepadan pastga, ustki qismlarida havo tortuvchi azbest quvurlari hamda dyukerning kirish va chiqish qismlari o‘lchab ko‘rilganda xavfsiz ekanligi aniqlangan.
Toshkent viloyati Ekologiya, atrof-muhitni muhofaza qilish va iqlim o‘zgarishi boshqarmasi “Margimush qabristoni” bo‘yicha rasmiy maʼlumotlarni taqdim etishga va joyiga chiqqan holda birgalikda o‘ganishga tayyor. Bu borada fuqarolarimizni ijtimoiy tarmoqlardagi fake va assosiz maʼlumotlarga ishonmaslikni so‘raymiz, deyiladi rasmiy xabarda.
Toshkent viloyati Bo‘stonliq tumanidagi Chorvoq suv ombori bo‘yida ozarbayjonlik tadbirkor Emin Agalarov tomonidan Sea Breeze Uzbekistan sayyohlik majmasi qurilishi kutilmoqda. Bu jamoatchilik orasida keg e’tirozlarga sabab bo‘lmoqda. Ekologiya vaziri Aziz Abduhakimov 23-iyul kuni Toshkent shahrida o‘tkazilgan matbuot anjumanida loyiha hujjatlari hali hukumatga taqdim etilmaganini bildirib, “Yo‘q deyishdan oldin taklifini ko‘raylik”, deb aytdi. Aziz Abduhakimov loyiha hujjatlari taqdim etilgach, majmua qurilishi masalasi jamoatchilik muhokamasiga qo‘yilishiga vaʼda berdi.
Izoh (0)