Saudiya Arabistonining Riyod shahrida shaxmat bo‘yicha nufuzli musobaqalardan biri — Esports World Cup turniri boshlandi. Unda O‘zbekiston vakillari Nodirbek Abdusattorov va Javohir Sindorov ishtirok etmoqda.
Musobaqaning guruh bosqichida jami 16 nafar ishtirokchi qatnashmoqda. Ular 4 ta guruhga bo‘linadi, har bir guruhda 4 tadan shaxmatchi bor.
Guruh bosqichi qoidalari quyidagicha:
- Kim ikki marta g‘alaba qozonsa — chorak finalga yo‘l oladi.
- Kim ikki bor mag‘lub bo‘lsa — musobaqani tark etadi.
Har bir bahs ikki o‘yindan iborat. Agar natija 1:1 bo‘lsa, g‘olib tay-brek orqali aniqlanadi.
29-iyul, seshanba kuni guruh bosqichining dastlabki bellashuvlari bo‘lib o‘tdi. C guruhi tarkibida Javohir Sindorov, Hikaru Nakamura, Vey Li va Alireza Firuzja kabi kuchli shaxmatchilar bor.
Javohir Sindorov ilk bahsda AQSH vakili Hikaru Nakamuraga qarshi dona surdi. Afsuski, u har ikki o‘yinda ham mag‘lub bo‘lib, mag‘lublar yo‘lagiga tushib ketdi. Guruhning boshqa bahsida Alireza Firuzja Xitoy vakili Vey Lini mag‘lub etdi va uni ham mag‘lublar yo‘lagiga tushirib yubordi.
Endi Javohir Sindorov guruhdan chiqish uchun aynan Vey Li bilan to‘qnash keladi. Agar ushbu bahsda o‘zbekistonlik shaxmatchi g‘alaba qozonsa, musobaqadagi ishtirokini davom ettiradi. Aks holda, turnir bilan xayrlashadi. Alireza Firuzja va Hikaru Nakamura o‘rtasidagi o‘yinda fransiyalik shaxmatchi ustun keldi va guruhdan chiqishni uddaladi. Endi Nakamura Sindorov hamda Vey Li o‘rtasidagi bahs g‘olibiga qarshi o‘ynaydi.
Musobaqadagi o‘zbekistonlik ikkinchi shaxmatchi — Nodirbek Abdusattorov ham ishtirokini mag‘lublar yo‘lagida davom ettirmoqda.
D guruhi tarkibida u dunyoning eng kuchli grossmeysterlari — Magnus Karlsen, Yan-Kshishtof Duda va Fabiano Karuana bilan bir guruhdan joy oldi.
Ilk bellashuvda Nodirbek dunyoning birinchi raqamli shaxmatchisi Magnus Karlsenga qarshi dona surib, imkoniyatni boy berdi. Natijada Abdusattorov mag‘lublar yo‘lagiga tushib ketdi. Guruhning ikkinchi o‘yinida polshalik grossmeyster Yan-Kshishtof Duda amerikalik Fabiano Karuanani mag‘lub etib, uni ham mag‘lublar yo‘lagiga tushirib yubordi.
Endi Nodirbek Abdusattorov guruhdan chiqish uchun aynan Fabiano Karuana bilan bahs olib boradi. G‘alaba qozongan o‘yinchi turnirdagi yurishini davom ettiradi, yutqazgan esa musobaqani tark etadi.
Shu bilan birga, Magnus Karlsen va Yan-Kshishtof Duda o‘rtasidagi bahsda norvegiyalik grossmeyster ustunlikni qo‘lga kiritdi va guruhdan chiqish masalasini hal qildi. Duda esa endi Abdusattorov – Karuana o‘yini g‘olibiga qarshi o‘ynaydi. Ushbu bahs g‘olibi guruhdan ikkinchi bo‘lib chorak finalga yo‘l oladi.
Ma’lumot uchun, o‘zbekistonlik shaxmatchilar ishtirokidagi bahslar bugun, 30-iyul kuni bo‘lib o‘tadi.
Izoh (0)