Дунёнинг еттита етакчи демократик мамлакатлари лидерлари Германиядаги саммитда баёнот қабул қилиб, Украинани унинг Россия тажовузига қарши курашда қанча керак бўлса, шунча қўллаб-қувватлашга ваъда берди, деб ёзади BBC Russia.
«Биз қанча керак бўлса, шунча молиявий, гуманитар, ҳарбий ва дипломатик кўмак кўрсатамиз ва Украина билан елкама-елка турамиз», — дейилади АҚШ, Германия, Япония, Британия, Франция, Италия ва Канада етакчилари баёнотида.
«Еттилик» мамлакатлари етакчиларининг муфассал ва кескин баёнотида, шунингдек, Россия ва Беларусга нисбатан санкция босимини кучайтиришга ҳам ваъда берилган.
«Биз президент Путинга ва унинг Беларусдаги ҳамтовоқларига иқтисодий ва сиёсий босимни сақлаб туришда ва кучайтиришда давом этамиз, шу тариқа, Россияни Украинага қарши тажовузкор уруш олиб бориш учун иқтисодий воситалардан маҳрум қиламиз, бундан кейин ҳам қанча зарур бўлса, шунча манзилли санкциялар қўллаб, ҳар бир босқичда биргаликда ҳаракат қиламиз», — дейилади баёнотда.
«Еттилик» мамлакатлари етакчилари Россия олтинига эмбарго киритишга, санкцияларни айланиб ўтишга уринишлар билан курашишга, Россия экспортига тарифлар киритишни мувофиқлаштиришга ва ўз қонунларини бузмаган ҳолда ушбу тарифлардан олинган маблағларни Украинага топшириш йўлалрини қидириб топишга ваъда бермоқда.
Бундан ташқари, G7 мамлакатлари россиялик сиёсий эмигрантларга ёрдам бермоқчи.
«Еттилик», шунингдек, Кремлдан Украина портларини қамалдан чиқариб, у ердан озиқ-овқат экспорт қилишга имконият яратишни талаб қилди.
Саммит иштирокчилари билан видеоалоқа орқали Украина президенти Владимир Зеленский ҳам суҳбатлашди. У, хусусан, яна бир марта иттифоқчилардан оғир қуроллар етказиб беришни тезлаштириш ва оширишни сўради — шунда, унинг сўзларига кўра, Украина урушни қишгача тугата олган бўларди.
Изоҳ (0)