Ijtimoiy tarmoqlarda Yozuvchilar uyushmasining Toshkent viloyatida joylashgan “Do‘rmon” ijod uyida mehmonxona va kottej narxlari keskin ortib ketgani ko‘pchilikning bahs-munozaralariga sabab bo‘ldi. “Daryo” muxbiri ijod uyida bo‘lib, holat yuzasidan surishtiruv o‘tkazdi.
Dastlab narxlarning ko‘tarilib ketishi shoir Yozuvchilar uyushmasi a’zosi Iftixor Xonxo‘jayev o‘z Facebook sahifasida “Shu kunlarda Do‘rmon ijod uyida bo‘layotgan voqealar” ko‘pchilik ijodkorlarning noroziligiga sabab bo‘layotgani haqida post qoldirgan. Unda narxlardan tashqari, ijod uyi bog‘idagi mevalarning sotib yuborilayotgani, chet mehmonlar ko‘p jalb qilinayotgani va basseynning pullik bo‘lishi, stadion qurilishiga e’tirozlari aytilgan.
O‘quvchilarga tushunarli bo‘lishi uchun yozuvchi Iftixor Xonxo‘jayev tomonidan keltirilgan fikrlar va bunga javoban “Do‘rmon” ijod uyi rahbari Asqar Ummatqulovning izohi ketma-ketlikda joylandi.
Shoir Iftixor Xonxo‘jayev:
“Narxlarning bir barobar ko‘tarilganligi, ya’ni mehmonxonada ijodkorlar uchun imtiyozli xonalarning eng arzonlari 30 mingdan birato‘la 58 mingga oshirilganligi, ijod uyi hududidagi kottejlarning ijara puli 920 mingdan 1 mln 840 ming bo‘lganligi va shartnomasi bir yildan oshganlarniki 3 mln 680 ming so‘mga oshirilganligi ijodkorlarning izzat nafsiga tegmoqda. Xo‘sh, narxlar nima sababdan birdaniga bunchalik ko‘tarilib ketdi? Birinchidan, mehmonxonaga har oy yuzlab yahudiy mehmonlar kelmoqda va ular mo‘maygina pul to‘layapti, endi ijodkorlardan tushadigan tushum rahbariyatni qoniqtirmay qo‘ydi. Ikkinchidan, bu yerni ijodkorlar kelib dam olib ijod qiladigan maskan emas, balki uyushma hisobini to‘ldiradigan fabrikaga aylantirish maqsad qilingan. Ya’ni bu yerga asta-sekin faqat puli borlar kela boshlaydi, puli yo‘qlar esa ko‘chada qolib o‘lib ketishsa ham uyushma rahbariyatiga farqi yo‘q”,
“Do‘rmon” ijod uyi rahbari Asqar Ummatqulov:
“Avval bir xona narxi bir kecha uchun Yozuvchilar uyushmasi a’zolariga 30 ming so‘m bo‘lgan. Uyushma a’zosi bo‘lmaganlarga esa 120 ming so‘m bo‘lgandi. Ikki yildan beri bu narx o‘zgartirilmay kelinayotgandi. Bugungi kunda 30 ming so‘m bilan oddiy oshxonaga kirib, bir marta ovqatlanish mumkin. Lekin 30 ming so‘mning ichida 3 mahal ovqatlanishi, Do‘rmon ijod uyidagi boshqa har qanday xizmat turlari bo‘lsa, konferensiya zali, kutubxona, ochiq basseyn xizmati — hammasi shunga kiritilgan. Endi bu narx o‘zini oqlolmayotganligi, asosiy saqlash xarajatlarini qoplash uyushma tomonidan qoplab berilayotganligi, uyushmadan budjet mablag‘i ajratilganligi hisobiga qoplab kelinmoqda.
Bugungi kunda narx-navoning, xarajatlarning oshib ketishini inobatga olib turib, 58 ming so‘mga oshirildi. Yarim lyuks xonalar 60 ming so‘m edi, 80 mingga oshirildi. Lyuks xonamiz 125 ming so‘m edi, u 135 ming so‘mga oshirildi.
Hukumat rahbarimizning ham, bozor iqtisodiyotining ham talabi – imkon qadar korxona o‘zining iqtisodiy samaradorligini o‘zi oshirish. To‘g‘ri, biz qo‘shimcha mijoz olamiz. Lekin birinchi e’tibor Yozuvchilar uyushmasi a’zolariga beriladi. Ular qachon kelishidan qat’i nazar, joy bilan ta’minlanadi. Bundan tashqari, bo‘sh qolgan joylardan samarali foydalanish maqsadida chet mehmonlarni ham kiritamiz. Bu mablag‘lar hisobiga ijodkorlarga yanada qulay sharoitlar yaratish imkoniyatimiz bo‘ladi.
Vaqt o‘tishi bilan narsalar, xonalar eskiradi. Ularni ta’mirlash xarajatini, jihozlarni yangilash o‘zimizning qo‘shimcha daromad mablag‘lar hisobidan shakllanib keladi.
Kottejlar masalasida aytadigan bo‘lsam, to‘g‘ri, uning ham narxi oshdi. Avval oyiga bitta xona 1 mln 200 ming so‘mga ijaraga berilgan. Endi 1 million 840 ming so‘mga oshirildi. Kottej 14-15 sotixlik katta hovli, ikki qavatli bino. Unda oilaviy yashab turish bilan bugungi kundagi qo‘yilgan narx bozor iqtisodiyotidan kelib chiqqan holda 150 dollar atrofida bo‘lishi mumkin. Buyam imtiyozli narx. Bunday sharoitlarni ko‘chadan ko‘raman, desangiz kamida 500 dollar bo‘lishi mumkin. Ikkinchidan, bu yerda kottejlarda muammo bo‘layotgan masala bor. Kottej aslida bir yilga beriladi, keyin uni topshirib, navbatda turganga berishimiz kerak. Amalda esa bizda 1 yil o‘tgach, o‘z ixtiyori bilan topshirish bo‘lmayapti. Boshqa ijodkorlarga ham imkoniyat berish uchun uni tijorat narxiga o‘tkazdik. Tijorat narxida turmagandan keyin boshqa joyda turish mumkin”.
Shoir Iftixor Xonxo‘jayev:
“Ijod uyi hududidagi hamma narsa, hatto ijodkorlar uchun qurilgan basseynlar ham pullik bo‘ldi”.
“Do‘rmon” ijod uyi rahbari Asqar Ummatqulov:
“Basseyn hali ishga tushmadi. Yaqinda ta’mirdan chiqardik. Rejaga ko‘ra, bu yerda turgan uyushma a’zolariga tekin, chetdan keladigan qiziquvchilar esa pullik bo‘ladi. Hozircha bu tasdiqlanmadi”.
Shoir Iftixor Xonxo‘jayev:
“Hududdagi 500 tuplik olmazor va giloszorlardan hamma xabardor bo‘lsa kerak? Bu mevalar esa aynan ijodkorlar uchun ekilgan. Ammo yaqinda tonnalab giloslarning chet elga ekspert qilinganligiga guvoh bo‘ldik. Ijod uyining rahbari esa “uyushmaga tushum kirityapman” deb qo‘ya qoldi xolos. Oddiy ishchi xodimlarining aytishicha, yaqin oylarda hududda futbol stadionlari qurilib, “Lokomativ” futbol jamoasiga ijaraga berilishi ko‘zda tutilgan. Bundan kelib chiqadiki, endi har kuni kamida qirq chog‘lik erkak ishtonchan holda ijod uyi hududida yugurib yuradi. Rahbarlarga esa buning farqi yo‘q. Tushum bo‘lsa bo‘ldi...
Hurmatli ijodkorlar! Asrlar davomida ijod ahlining eng sevimli maskaniga aylangan Do‘rmon ijod uyini saqlab qolishda o‘z hissamizni qo‘shaylik! #Do‘rmonIjodUyiniSaqlabQolaylik! heshtegi ostida bu yerda bo‘lgan qiziqarli xotiralardan, ustoz ijodkorlarning esdaliklaridan qo‘yib boraylik va Yozuvchilar uyushmasi rahbariyatiga ijod uyi hali bizga kerak ekanligini anglataylik!”
“Do‘rmon” ijod uyi rahbari Asqar Ummatqulov:
“Bog‘dagi mevalardan hosil olamiz, bu yil ham oldik. Mahsulotni olib, o‘zimizning oshxonamizga kirim qilamiz. Undan shu yerdagi ijodkorlar bahramand bo‘ladi. O‘rnatilgan normalar bo‘yicha har bir mehmonning dasturxoniga qo‘yiladi”.
“Daryo” muxbiri “Do‘rmon” ijod uyidan foydalanayotgan Yozuvchilar uyushmasining a’zolaridan izoh oldi.
Muhammad Piriyev, yozuvchi
“Men allaqachon narxlar oshsa kerak deb yurgan edim. Narxlar ko‘proq oshgani bor gap. Sal kam 80-90 foiz atrofida oshgan. Faqatgina bu yerda emas, butun dunyoda narxlar oshmoqda.
Bu yerda uch mahal ovqatlantirishadi, sharoitlari yaxshi, xizmatchilari ham yaxshi muomalada bo‘ladi. Hamma narsalarimni tozalab almashtirib turishadi. Issiq-sovuq suv har doim mavjud. Tok masalasi yaxshi televideniye bor. Nima demoqchimanki, hozirgi sharoitga mutanosib ish bo‘ldi deb o‘ylayman.
Yaxshi tomoni bundan 3 yil ilgari faqat bir kishiga 24 kun yiliga imtiyoz berilar edi. 3 yilcha bo‘ldi Yozuvchilar uyushmasi a’zolarining turmush o‘rtoqlariga ham imtiyoz berildi. Turmush o‘rtog‘imga ham alohida xona berilgan. Narx-navoning sal-pal oshishiga mutanosib tarzda bular yiliga 2-marta imtiyoz beradigan qilgan”.
Jovli Xushboq, yozuvchi:
“Yigirma yildan beri O‘zbekiston yozuvchilar uyushmasining a’zosi bo‘lib shu yerda ijod qilyapman. Bu yerda yaxshi sharoitlar bo‘lganligi, umuman ijod uchun qulay bo‘lganligi bois yozuvchi-shoirlar, adabiyotshunoslar kelib ijod qiladi. Sharoitlar yaxshi bo‘lganligi uchun xursandmiz ko‘pchiligimiz. Lekin bu narxlar masalasi juda katta muammo emas, bu juda mayda-chuyda gaplar. Eng muhimi, ijod qilish.
Narxlar 50 ming so‘m bo‘ladimi, 100 ming so‘m bo‘ladimi, bu yerda yaxshi sharoitlar bo‘lsa, ovqatlari yaxshi bo‘lsa. Yana qo‘shimcha ijodiy muhit yaratilsa, ijodkorlar bilan uchrashuvlar bo‘lsa, umuman ijodiy muhit qaynasa, ijodkorlar uchun bu narxlar hech qanday ta’sir qilmaydi. Masalan, O‘zbekiston yozuvchilar uyushmasida 1 500 nafarga yaqin a’zo bor. Ularning ko‘pchiligi bu yerga kelmaydi. Sababi ijodiy muhit kamligidan, ijodiy uchrashuvlar kamligidan. Ularning ko‘pchiligini jalb qilish kerak”.
Abdulla Sher, shoir:
“Men juda yaxshi o‘ylab qilingan ish deb bilaman. Sababi bir xona 58 ming so‘m bo‘ldi, lekin 24 kun imtiyozlini o‘rniga 48 kun imtiyozli qilishdi. Ikkinchi tomoni, uyushmaga budjetdan pul ajratiladi. Uni ketadigan joyi juda ko‘p. “Do‘rmon” ijod uyiga juda katta pul ajrata olmaydi. 58 ming so‘m bilan hech narsa bo‘lmaydi”.
“Daryo” voqealar rivojini kuzatib boradi.
Izoh (0)