Ижтимоий тармоқларда Ёзувчилар уюшмасининг Тошкент вилоятида жойлашган «Дўрмон» ижод уйида меҳмонхона ва коттеж нархлари кескин ортиб кетгани кўпчиликнинг баҳс-мунозараларига сабаб бўлди. «Дарё» мухбири ижод уйида бўлиб, ҳолат юзасидан суриштирув ўтказди.
Дастлаб нархларнинг кўтарилиб кетиши шоир Ёзувчилар уюшмаси аъзоси Ифтихор Хонхўжаев ўз Facebook саҳифасида «Шу кунларда Дўрмон ижод уйида бўлаётган воқеалар» кўпчилик ижодкорларнинг норозилигига сабаб бўлаётгани ҳақида пост қолдирган. Унда нархлардан ташқари, ижод уйи боғидаги меваларнинг сотиб юборилаётгани, чет меҳмонлар кўп жалб қилинаётгани ва бассейннинг пуллик бўлиши, стадион қурилишига эътирозлари айтилган.
Ўқувчиларга тушунарли бўлиши учун ёзувчи Ифтихор Хонхўжаев томонидан келтирилган фикрлар ва бунга жавобан «Дўрмон» ижод уйи раҳбари Асқар Умматқуловнинг изоҳи кетма-кетликда жойланди.
Шоир Ифтихор Хонхўжаев:
«Нархларнинг бир баробар кўтарилганлиги, яъни меҳмонхонада ижодкорлар учун имтиёзли хоналарнинг энг арзонлари 30 мингдан биратўла 58 мингга оширилганлиги, ижод уйи ҳудудидаги коттежларнинг ижара пули 920 мингдан 1 млн 840 минг бўлганлиги ва шартномаси бир йилдан ошганларники 3 млн 680 минг сўмга оширилганлиги ижодкорларнинг иззат нафсига тегмоқда. Хўш, нархлар нима сабабдан бирданига бунчалик кўтарилиб кетди? Биринчидан, меҳмонхонага ҳар ой юзлаб яҳудий меҳмонлар келмоқда ва улар мўмайгина пул тўлаяпти, энди ижодкорлардан тушадиган тушум раҳбариятни қониқтирмай қўйди. Иккинчидан, бу ерни ижодкорлар келиб дам олиб ижод қиладиган маскан эмас, балки уюшма ҳисобини тўлдирадиган фабрикага айлантириш мақсад қилинган. Яъни бу ерга аста-секин фақат пули борлар кела бошлайди, пули йўқлар эса кўчада қолиб ўлиб кетишса ҳам уюшма раҳбариятига фарқи йўқ»,
«Дўрмон» ижод уйи раҳбари Асқар Умматқулов:
«Аввал бир хона нархи бир кеча учун Ёзувчилар уюшмаси аъзоларига 30 минг сўм бўлган. Уюшма аъзоси бўлмаганларга эса 120 минг сўм бўлганди. Икки йилдан бери бу нарх ўзгартирилмай келинаётганди. Бугунги кунда 30 минг сўм билан оддий ошхонага кириб, бир марта овқатланиш мумкин. Лекин 30 минг сўмнинг ичида 3 маҳал овқатланиши, Дўрмон ижод уйидаги бошқа ҳар қандай хизмат турлари бўлса, конференция зали, кутубхона, очиқ бассейн хизмати — ҳаммаси шунга киритилган. Энди бу нарх ўзини оқлолмаётганлиги, асосий сақлаш харажатларини қоплаш уюшма томонидан қоплаб берилаётганлиги, уюшмадан бюджет маблағи ажратилганлиги ҳисобига қоплаб келинмоқда.
Бугунги кунда нарх-навонинг, харажатларнинг ошиб кетишини инобатга олиб туриб, 58 минг сўмга оширилди. Ярим люкс хоналар 60 минг сўм эди, 80 мингга оширилди. Люкс хонамиз 125 минг сўм эди, у 135 минг сўмга оширилди.
Ҳукумат раҳбаримизнинг ҳам, бозор иқтисодиётининг ҳам талаби – имкон қадар корхона ўзининг иқтисодий самарадорлигини ўзи ошириш. Тўғри, биз қўшимча мижоз оламиз. Лекин биринчи эътибор Ёзувчилар уюшмаси аъзоларига берилади. Улар қачон келишидан қатъи назар, жой билан таъминланади. Бундан ташқари, бўш қолган жойлардан самарали фойдаланиш мақсадида чет меҳмонларни ҳам киритамиз. Бу маблағлар ҳисобига ижодкорларга янада қулай шароитлар яратиш имкониятимиз бўлади.
Вақт ўтиши билан нарсалар, хоналар эскиради. Уларни таъмирлаш харажатини, жиҳозларни янгилаш ўзимизнинг қўшимча даромад маблағлар ҳисобидан шаклланиб келади.
Коттежлар масаласида айтадиган бўлсам, тўғри, унинг ҳам нархи ошди. Аввал ойига битта хона 1 млн 200 минг сўмга ижарага берилган. Энди 1 миллион 840 минг сўмга оширилди. Коттеж 14-15 сотихлик катта ҳовли, икки қаватли бино. Унда оилавий яшаб туриш билан бугунги кундаги қўйилган нарх бозор иқтисодиётидан келиб чиққан ҳолда 150 доллар атрофида бўлиши мумкин. Буям имтиёзли нарх. Бундай шароитларни кўчадан кўраман, десангиз камида 500 доллар бўлиши мумкин. Иккинчидан, бу ерда коттежларда муаммо бўлаётган масала бор. Коттеж аслида бир йилга берилади, кейин уни топшириб, навбатда турганга беришимиз керак. Амалда эса бизда 1 йил ўтгач, ўз ихтиёри билан топшириш бўлмаяпти. Бошқа ижодкорларга ҳам имконият бериш учун уни тижорат нархига ўтказдик. Тижорат нархида турмагандан кейин бошқа жойда туриш мумкин».
Шоир Ифтихор Хонхўжаев:
«Ижод уйи ҳудудидаги ҳамма нарса, ҳатто ижодкорлар учун қурилган бассейнлар ҳам пуллик бўлди».
«Дўрмон» ижод уйи раҳбари Асқар Умматқулов:
«Бассейн ҳали ишга тушмади. Яқинда таъмирдан чиқардик. Режага кўра, бу ерда турган уюшма аъзоларига текин, четдан келадиган қизиқувчилар эса пуллик бўлади. Ҳозирча бу тасдиқланмади».
Шоир Ифтихор Хонхўжаев:
«Ҳудуддаги 500 туплик олмазор ва гилосзорлардан ҳамма хабардор бўлса керак? Бу мевалар эса айнан ижодкорлар учун экилган. Аммо яқинда тонналаб гилосларнинг чет элга эксперт қилинганлигига гувоҳ бўлдик. Ижод уйининг раҳбари эса «уюшмага тушум киритяпман» деб қўя қолди холос. Оддий ишчи ходимларининг айтишича, яқин ойларда ҳудудда футбол стадионлари қурилиб, «Локоматив» футбол жамоасига ижарага берилиши кўзда тутилган. Бундан келиб чиқадики, энди ҳар куни камида қирқ чоғлик эркак иштончан ҳолда ижод уйи ҳудудида югуриб юради. Раҳбарларга эса бунинг фарқи йўқ. Тушум бўлса бўлди...
Ҳурматли ижодкорлар! Асрлар давомида ижод аҳлининг энг севимли масканига айланган Дўрмон ижод уйини сақлаб қолишда ўз ҳиссамизни қўшайлик! #Do‘rmonIjod Uyini SaqlabQolaylik! ҳештеги остида бу ерда бўлган қизиқарли хотиралардан, устоз ижодкорларнинг эсдаликларидан қўйиб борайлик ва Ёзувчилар уюшмаси раҳбариятига ижод уйи ҳали бизга керак эканлигини англатайлик!»
«Дўрмон» ижод уйи раҳбари Асқар Умматқулов:
«Боғдаги мевалардан ҳосил оламиз, бу йил ҳам олдик. Маҳсулотни олиб, ўзимизнинг ошхонамизга кирим қиламиз. Ундан шу ердаги ижодкорлар баҳраманд бўлади. Ўрнатилган нормалар бўйича ҳар бир меҳмоннинг дастурхонига қўйилади».
«Дарё» мухбири «Дўрмон» ижод уйидан фойдаланаётган Ёзувчилар уюшмасининг аъзоларидан изоҳ олди.
Муҳаммад Пириев, ёзувчи
«Мен аллақачон нархлар ошса керак деб юрган эдим. Нархлар кўпроқ ошгани бор гап. Сал кам 80-90 фоиз атрофида ошган. Фақатгина бу ерда эмас, бутун дунёда нархлар ошмоқда.
Бу ерда уч маҳал овқатлантиришади, шароитлари яхши, хизматчилари ҳам яхши муомалада бўлади. Ҳамма нарсаларимни тозалаб алмаштириб туришади. Иссиқ-совуқ сув ҳар доим мавжуд. Ток масаласи яхши телевидение бор. Нима демоқчиманки, ҳозирги шароитга мутаносиб иш бўлди деб ўйлайман.
Яхши томони бундан 3 йил илгари фақат бир кишига 24 кун йилига имтиёз берилар эди. 3 йилча бўлди Ёзувчилар уюшмаси аъзоларининг турмуш ўртоқларига ҳам имтиёз берилди. Турмуш ўртоғимга ҳам алоҳида хона берилган. Нарх-навонинг сал-пал ошишига мутаносиб тарзда булар йилига 2 марта имтиёз берадиган қилган».
Жовли Хушбоқ, ёзувчи:
«Йигирма йилдан бери Ўзбекистон ёзувчилар уюшмасининг аъзоси бўлиб шу ерда ижод қиляпман. Бу ерда яхши шароитлар бўлганлиги, умуман ижод учун қулай бўлганлиги боис ёзувчи-шоирлар, адабиётшунослар келиб ижод қилади. Шароитлар яхши бўлганлиги учун хурсандмиз кўпчилигимиз. Лекин бу нархлар масаласи жуда катта муаммо эмас, бу жуда майда-чуйда гаплар. Энг муҳими, ижод қилиш.
Нархлар 50 минг сўм бўладими, 100 минг сўм бўладими, бу ерда яхши шароитлар бўлса, овқатлари яхши бўлса. Яна қўшимча ижодий муҳит яратилса, ижодкорлар билан учрашувлар бўлса, умуман ижодий муҳит қайнаса, ижодкорлар учун бу нархлар ҳеч қандай таъсир қилмайди. Масалан, Ўзбекистон ёзувчилар уюшмасида 1 500 нафарга яқин аъзо бор. Уларнинг кўпчилиги бу ерга келмайди. Сабаби ижодий муҳит камлигидан, ижодий учрашувлар камлигидан. Уларнинг кўпчилигини жалб қилиш керак».
Абдулла Шер, шоир:
«Мен жуда яхши ўйлаб қилинган иш деб биламан. Сабаби бир хона 58 минг сўм бўлди, лекин 24 кун имтиёзлини ўрнига 48 кун имтиёзли қилишди. Иккинчи томони, уюшмага бюджетдан пул ажратилади. Уни кетадиган жойи жуда кўп. «Дўрмон» ижод уйига жуда катта пул ажрата олмайди. 58 минг сўм билан ҳеч нарса бўлмайди».
«Дарё» воқеалар ривожини кузатиб боради.
Изоҳ (0)