АҚШга кўчиб кетган ўзбекистонликлар ҳаёти билан боғлиқ тадқиқотнинг илк натижалари эълон қилинди

Иқтисодиёт фанлари бўйича фалсафа доктори Шоирахон Нурдинова тадқиқотига кўра АҚШдаги эркинлик ва қадриятлар ўзбек аёлларининг ижтимоий-иқтисодий фаоллиги орттирган. Бу ҳақда Review хабар бермоқда.

Хотин-қизларда эркакларга нисбатан олий маълумот олишга бўлган интилишнинг ортиш тенденцияси пайдо бўлган.

Шоирахон Нурдинова ўзининг маърузасида мустақилликдан сўнг АҚШга кўчиб кетган ўзбеклар ҳаёти билан боғлиқ тадқиқотининг илк натижаларини маълум қилди.

Турли миллатга мансуб иммигрантлар дастури доирасида ўзбекистонликларга 2017 йилда 4 095 нафар, 2018 йилда 4 612 нафар ва 2019 йилда 2 550 нафар доимий резидентлик мақоми берилган.

Мазкур дастур орқали келганлар АҚШдаги ўзбек мигрантларининг асосий қисмини ташкил этиб, асосан, Нью-Йорк шаҳрига жойлашган.

Ўзбек жамиятлари етакчилари орқали мазкур тадқиқот учун иштирокчилар танлаб олинган. Мазкур тадқиқотда мигрантларнинг ҳаёт сифатини ёритиб бериш учун интервью методидан фойдаланилган.

Чуқурлаштирилган интервьюлар 25 дан 45 дақиқагача давом этган. Тадқиқотда Нью-Йорк шаҳри, Индиана ва Чикаго штатларида яшовчи 20 нафар ўзбек мигранти иштирок этган.

Иштирокчиларнинг ўртача ёши 44,5 ёшни ташкил этиб, меҳнатга лаёқатли аҳоли ҳисобланади. Иштирокчилар 6 эркак ва 14 аёлни ўз ичига олади. Барча эркак респондентлар олий маълумотли ёки ундан юқори даражага эга.

14 нафар аёлдан 4 нафари ўрта, 1 нафари ўрта махсус, 9 нафари олий маълумотга эга. Иштирокчиларнинг 90 фоизи охирги 2 йил ичида иш билан банд бўлган. 80 фоизи ҳозирда иш билан банд ва 10 фоизи охирги 12 ой ичида ишлаган.

АҚШдаги эркинлик ва қадриятлар натижасида ўзбеклар аёлларнинг жамиятдаги ўрни ҳақидаги стереотипларни ўзгартирганлиги кузатилди. Ўзбекистонда уй бекаси бўлган кўпчилик аёллар АҚШда ишлаш ёки ўқишни бошлаган.

40 ёшли собиқ уй бекаси Қўшма Штатларга кўчиб келганидан сўнг, университетда таълим олиб, ҳуқуқшунос бўлганлигини айтади. Бу эса унга ўзига бўлган ишончни орттирган, ҳаёт сифати яхшиланган.

48 ёшида АҚШга кўчиб келган бошқа бир уй бекаси инглиз тилини ўрганиб, иш топа олганини ўзининг муваффақияти деб билади.

АҚШга 12 йил олдин кўчиб келган эркак мигрант фикрига кўра, АҚШдаги ўзбек аёллари таълимга эркаклардан кўра кўпроқ қизиқиш билдиради.

Ўзбекистонлик аёллар, асосан, тиббиёт ва молия соҳасини афзал кўради, — дейди эксперт.

АҚШдаги эркинлик ва қадриятлар ўзбек аёлларининг ижтимоий-иқтисодий фаоллиги орттирган. Хотин-қизларда эркак мигрантларга нисбатан олий маълумот олишга бўлган интилишнинг ортиш тенденцияси пайдо бўлган.

Қўшма Штатлардаги ўзбеклар учун миллийликни сақлаш ҳаётдан қониқишга таъсир кўрсатувчи асосий омил сифатида кўрилади.