Namanganda viloyat MIB boshqarmasi huzurida Cаll-center tamoyili bo‘yicha ish olib boradigan bo‘lim faoliyat boshladi. Bu haqda “Daryo” muxbiri Azizbek Abduvaliyev xabar bermoqda.
Namangan tumanlararo ixtisoslashtirilgan bo‘limida ijro hujjatlarining soddalashtirilgan tarzda ijrosini ta’minlash, ma’muriy jarimalar, soliq qarzi va davlat bojini undirish bo‘yicha undiruv qarzdorning yashash joyi yoki mol-mulki turgan joyga bormagan holda axborot-kommunikatsiya texnologiyalarini qo‘llash yo‘li bilan masofadan turib amalga oshirilmoqda.
Shuningdek, to‘lovlarni qarzdor fuqarolarga bo‘lim tomonidan yuborilgan xabarnomada ko‘rsatilgan ID raqamlariga elektron to‘lov tizimlari orqali masofadan to‘lovlarni amalga oshirish imkoniyatlari yaratildi.
“Bo‘limda faoliyat olib borayotgan har bir davlat ijrochisi qarzdorga call-center orqali bog‘lanib, ularning huquq va majburiyatlarini tushuntirib bormoqda. 12 nafar davlat ijrochisi tomonidan qisqa vaqt ichida 480 million so‘mlik 1272 ta ijro hujjati amalda tamomlandi”, — deydi bo‘lim boshlig‘i Rahimjon Ismatullayev.
Viloyat MIB boshqarmasi boshlig‘i Behzod Mirzaahmedovning ma’lum qilishicha, zamonaviy texnologiyalar aliment undirish borasida ham keng qo‘llanmoqda. Boshqarmada aliment majburiyatlarini ijro etish va nazorat qilishning yagona axborot tizimi orqali viloyatdagi 25 ming nafar aliment oluvchi va to‘lovchi haqidagi ma’lumotlar bilan onlayn tartibida tanishib borish mumkin. Bu chora-tadbirlar natijasida joriy yilning yakunlanmagan 6 oyi davomida viloyatda 32,1 milliard so‘mlik aliment pullari undirib berilishi ta’minlandi.
Mavzuga doir:
Izoh (0)