Наманганда вилоят МИБ бошқармаси ҳузурида Cаll-center тамойили бўйича иш олиб борадиган бўлим фаолият бошлади. Бу ҳақда «Дарё» мухбири Азизбек Абдувалиев хабар бермоқда.
Наманган туманлараро ихтисослаштирилган бўлимида ижро ҳужжатларининг соддалаштирилган тарзда ижросини таъминлаш, маъмурий жарималар, солиқ қарзи ва давлат божини ундириш бўйича ундирув қарздорнинг яшаш жойи ёки мол-мулки турган жойга бормаган ҳолда ахборот-коммуникация технологияларини қўллаш йўли билан масофадан туриб амалга оширилмоқда.
Шунингдек, тўловларни қарздор фуқароларга бўлим томонидан юборилган хабарномада кўрсатилган ИД рақамларига электрон тўлов тизимлари орқали масофадан тўловларни амалга ошириш имкониятлари яратилди.
«Бўлимда фаолият олиб бораётган ҳар бир давлат ижрочиси қарздорга cалл-center орқали боғланиб, уларнинг ҳуқуқ ва мажбуриятларини тушунтириб бормоқда. 12 нафар давлат ижрочиси томонидан қисқа вақт ичида 480 миллион сўмлик 1272 та ижро ҳужжати амалда тамомланди», — дейди бўлим бошлиғи Раҳимжон Исматуллаев.
Вилоят МИБ бошқармаси бошлиғи Беҳзод Мирзааҳмедовнинг маълум қилишича, замонавий технологиялар алимент ундириш борасида ҳам кенг қўлланмоқда. Бошқармада алимент мажбуриятларини ижро этиш ва назорат қилишнинг ягона ахборот тизими орқали вилоятдаги 25 минг нафар алимент олувчи ва тўловчи ҳақидаги маълумотлар билан онлайн тартибида танишиб бориш мумкин. Бу чора-тадбирлар натижасида жорий йилнинг якунланмаган 6 ойи давомида вилоятда 32,1 миллиард сўмлик алимент пуллари ундириб берилиши таъминланди.
Мавзуга доир:
Изоҳ (0)