“Italiyalik ekspertlar Yevropaning ko‘p shaharlaridan ko‘ra Toshkentda yashillik darajasi baland deb baho berdi” – Ekoqo‘mita raisi Narzullo Oblomurodov

O‘zbekistonda ekalogiya sohasida qilinayotgan ishlarga baho berishga hali erta. Bu haqda O‘zbekiston Ekologiya va atrof-muhitni muhofaza qilish davlat qo‘mitasi raisi Narzullo Oblomurodov “Daryo” muxbiriga bergan qisqacha intervyusida aytib o‘tdi.

Narzullo Oblomurodovning aytishicha, juda katta ko‘lamdagi ishlar boshlangan, lekin bunga baho berishga hali erta.

“Ekologiya sohasida ‘Yashil makon’ umummilliy harakati, chiqindilarni boshqarish, atrof-muhitga turli xil tashlanmalarni kamaytirish va bu borada axborot texnologiyalarini joriy etish kabi ishlarimiz bizni to‘g‘ri yo‘ldan borayotganimizni ko‘rsatadi. Lekin hali qiladigan ishlarimiz anchagina deb o‘ylayman”, – dedi qo‘mita raisi.

Uning alohida ta’kidlashicha, yevropalik ekspertlar O‘zbekiston poytaxtini yashillik darajasini yuqori baholashgan.

“Yashil makon” umummilliy harkati bo‘yicha Italiyadan katta ekspert guruhi keldi. Ular Yevropaning ko‘p shaharlaridan ko‘ra Toshkentda yashillik darajasi baland deb baho berdi. Albatta, bizning iqlimimizga qancha yashillik ko‘p bo‘lsa, daraxt ko‘p bo‘lsa shuncha yaxshi. Chunki bizda issiq, ayniqsa, issiq yoz kunlarimizda mo‘tadil iqlimni saqlab turish juda ham muhim. Shu asnoda Yevropa tajribasini ham ko‘ryapmiz. Hamma joyda ham davlat yoki ekologiya bo‘yicha mas’ul idoralar bizga o‘xshab har bitta daraxtni orqasidan qo‘riqlab, “kesadi, kesmaydi” degan narsa hech qayerda yo‘q. Bunda jamoatchilikning, xalqning o‘zi faol bo‘lishi kerak. Biz ham, albatta, hamma ishimizni qilishimiz kerak, bo‘ynimizdan hech kim xolos qilmaydi. Qonun oldida majburyatimiz, mas’uliyatimiz, javobgarligimiz bor. Shu bilan birga jamoatchilik bilan birlashib, ayrim salbiy holatlarga keskin munosabat bildiradigan bo‘lsak, uning ta’siri juda ham kuchli bo‘ladi”, – dedi Narzullo Oblomurodov.

Suhbatda ta’kidlanishicha, butun dunyoda kuzatilayotgan iqlim o‘zgarishlarining oqibatlari O‘zbekistonga ikki karra ta’sir qilyapti.

“Bizda qurg‘oqchilik, suv tanqisligi, yerning cho‘llanishi bilan bog‘liq masalalar juda ham dolzarb. Shu bois jamoatchilikning e’tiborini ekologiyaga qaratishimiz kerak. Bu faqatgina davlat qiladigan ish emas, butun jamiyat qilishi kerak. Masalan, suv va undan oqilona foydalanishni olaylik. Bu har birimiz har kuni qilishimiz kerak bo‘lgan masala. Barcha tabiiy resurslarga, shu jumladan, suvga ham e’tiborli bo‘lishni hammamizdan zamonning o‘zi talab qiladi. Shuning uchun jamoatchilik ham ko‘proq faol bo‘lishi va mutaxasislar, olimlar, ekspertlarning ham bu borada aniq bir takliflari, fikrlari orqali o‘zining faolligini ko‘rsatib borishi ma’qul deb o‘ylayman”, – Ekologiya va atrof-muhitni muhofaza qilish davlat qo‘mitasi raisi.