«Италиялик экспертлар Европанинг кўп шаҳарларидан кўра Тошкентда яшиллик даражаси баланд деб баҳо берди» – Экоқўмита раиси Нарзулло Обломуродов

Ўзбекистонда экалогия соҳасида қилинаётган ишларга баҳо беришга ҳали эрта. Бу ҳақда Ўзбекистон Экология ва атроф-муҳитни муҳофаза қилиш давлат қўмитаси раиси Нарзулло Обломуродов «Дарё» мухбирига берган қисқача интервьюсида айтиб ўтди.

Нарзулло Обломуродовнинг айтишича, жуда катта кўламдаги ишлар бошланган, лекин бунга баҳо беришга ҳали эрта.

«Экология соҳасида ‘Яшил макон’ умуммиллий ҳаракати, чиқиндиларни бошқариш, атроф-муҳитга турли хил ташланмаларни камайтириш ва бу борада ахборот технологияларини жорий этиш каби ишларимиз бизни тўғри йўлдан бораётганимизни кўрсатади. Лекин ҳали қиладиган ишларимиз анчагина деб ўйлайман», – деди қўмита раиси.

Унинг алоҳида таъкидлашича, европалик экспертлар Ўзбекистон пойтахтини яшиллик даражасини юқори баҳолашган.

«Яшил макон» умуммиллий ҳаркати бўйича Италиядан катта эксперт гуруҳи келди. Улар Европанинг кўп шаҳарларидан кўра Тошкентда яшиллик даражаси баланд деб баҳо берди. Албатта, бизнинг иқлимимизга қанча яшиллик кўп бўлса, дарахт кўп бўлса шунча яхши. Чунки бизда иссиқ, айниқса, иссиқ ёз кунларимизда мўътадил иқлимни сақлаб туриш жуда ҳам муҳим. Шу аснода Европа тажрибасини ҳам кўряпмиз. Ҳамма жойда ҳам давлат ёки экология бўйича масъул идоралар бизга ўхшаб ҳар битта дарахтни орқасидан қўриқлаб, «кесади, кесмайди» деган нарса ҳеч қаерда йўқ. Бунда жамоатчиликнинг, халқнинг ўзи фаол бўлиши керак. Биз ҳам, албатта, ҳамма ишимизни қилишимиз керак, бўйнимиздан ҳеч ким холос қилмайди. Қонун олдида мажбурятимиз, масъулиятимиз, жавобгарлигимиз бор. Шу билан бирга жамоатчилик билан бирлашиб, айрим салбий ҳолатларга кескин муносабат билдирадиган бўлсак, унинг таъсири жуда ҳам кучли бўлади», – деди Нарзулло Обломуродов.

Суҳбатда таъкидланишича, бутун дунёда кузатилаётган иқлим ўзгаришларининг оқибатлари Ўзбекистонга икки карра таъсир қиляпти.

«Бизда қурғоқчилик, сув танқислиги, ернинг чўлланиши билан боғлиқ масалалар жуда ҳам долзарб. Шу боис жамоатчиликнинг эътиборини экологияга қаратишимиз керак. Бу фақатгина давлат қиладиган иш эмас, бутун жамият қилиши керак. Масалан, сув ва ундан оқилона фойдаланишни олайлик. Бу ҳар биримиз ҳар куни қилишимиз керак бўлган масала. Барча табиий ресурсларга, шу жумладан, сувга ҳам эътиборли бўлишни ҳаммамиздан замоннинг ўзи талаб қилади. Шунинг учун жамоатчилик ҳам кўпроқ фаол бўлиши ва мутахасислар, олимлар, экспертларнинг ҳам бу борада аниқ бир таклифлари, фикрлари орқали ўзининг фаоллигини кўрсатиб бориши маъқул деб ўйлайман», – Экология ва атроф-муҳитни муҳофаза қилиш давлат қўмитаси раиси.