Buxoroda jarima to‘lovidan bosh tortib, MIB xodimlarini do‘pposlagan fuqaro ikki yil muddatga ozodlikdan mahrum qilindi

Buxoroda spirtli ichimlik iste’mol qilgan holda avtomashina boshqarib, jarimaga tortilgan fuqaro to‘lovdan bosh tortib, MIB xodimlarini do‘pposladi. U bu xatti-harakati uchun ikki yil muddatga qamaladigan bo‘ldi. Bu haqda Jinoyat ishlari bo‘yicha G‘ijduvon tumani sudiga tayanib, “Daryo” muxbiri xabar bermoqda.

Ma’lum bo‘lishicha, G‘ijduvon tumanida yashovchi Sh.Sh. spirtli ichimlik iste’mol qilib, mast holda avtotransport vositasini boshqargan. Va sud qaroriga ko‘ra, vaqtincha avtomashina boshqarish huquqidan mahrum qilingan holda 6 million 750 ming so‘m jarimaga tortilgan.

Shundan so‘ng Sh.Sh. oilaviy sharoitini sabab qilib ko‘rsatib, qaror ijrosini bajarmay kelgan va qayta-qayta talab qilinishiga qaramay, jarimani to‘lashdan bosh tortgan. Tuman MIB xodimlari Yashin Xoliqov hamda Zuhrjon Zayniyevlar qarzdorning yashash xonadoniga borib, uyidagi mol-mulkini xatlash uchun kelganini bildirgan. Spirtli ichimlik ta’sirida bo‘lgan Sh.Sh. esa MIB xodimlarini uyga kiritmaslikka harakat qilib, ularga kuch ishlatib, darvozadan tashqariga chiqargan. MIB xodimlari uning xatti-harakati uchun xizmat mashinasiga mindirmoqchi bo‘lganida, fuqaro ularga faol qarshilik ko‘rsatgan. Va ularni do‘pposlab, nojo‘ya so‘zlar bilan haqorat qilgan. Zuhrjon Zayniyevning chap oyoq tizzasiga tepib, yerga yiqitgan, Yashin Xoliqovning jag‘ qismiga hamda qo‘l bilak qismiga bir necha marta musht tushirib, “senlarga pul beramanmi?”, deya qo‘pol so‘zlar bilan so‘kinishda davom etgan. Shu payt aybdorning ota-onasi va yaqinlari voqeadan voqif bo‘lib, janjal sodir bo‘lgan joyga to‘plangan. Ular janjal oldini olishga urinib, o‘g‘ilini tartibga chaqirishga uringan. Biroq Sh.Sh. to‘xtamagan.

Xizmat vazifasini bajarayotgan hokimiyat vakilining qonuniy faoliyatiga faol qarshilik ko‘rsatib, ularga yengil tan jarohati yetkazib, sha’ni va qadr-qimmatini tahqirlagan Sh.Sh. Jinoyat kodeksi 140-moddasi 3-qismining “a” bandi (haqorat qilish) va 219-moddasi 2-qismi bilan (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish)da ayblanib, 2 yil-u 1 oy muddatga ozodlikdan mahrum qilingan.